Charter Document - 06510130

Her is geswutelod an ðis gewrite hu Ælfheah ealdorman his cwidæ gecwæðen hæfð be his cynehlafordæs geþafuncge þæt is þonnæ æræst þæt he gean his drihtne for his sawlæ þæarfæ þæs landæs at Ællændune and þæs at Crundelom to ealdan mynstære to Winticeastræ And þæra twæntiga hida at Ceorlatunæ into Mealdælmæsbyrig and þæra fiftyna hida at Suðtune into Baðan and he gean his cynehlafordæ þæra hundtwæntiga hida at Wyrðæ and þæs landæs at Coccham and at Þæcham and at Ceolæswyrðæ And at Incgenæsham and at Ægelesbyrig and at Wændofron And þreo hund mancusa goldæs and annæ dics an þrym pundom And anæ soppcuppan an þrym pundan and an handsex and þæræ lecge is hundeahtati mancussa goldæs and seax swurð and seax hors mid geredan and swa fæla spæra and scylda And he gean Ælfriðæ ðæs cyninges wifæ his gefæðeran þæs landæs at Scyræburnan ealswa hit stænt And þam yldran æþælingæ þæs cyngæs suna and hiræ þritiga mancussa goldæs and anæs swurdæs And þam gincgran ðæs landes at Wolcnæsstedæ And he gean Ælfhære his breðær þæs landæs at Færndunæ and at Ealdincburnan And Godwinæ his suna þæs at Tudincgatunæ and Ælfwerdæ at Wyritunæ And Æþelwerdæ his mege at Wicumun And Ælfwine his swustur suna þæs at Froxafelda Þonnæ an ic Ælfsiþæ minon wifæ gyf heo leng beoð þonne ic and it swa gehylt swa ic hiræ truwan to hæbbe ealra þara oðæra landa þæ ic læfæ And heo þanne gæornlicæ of þam god geþæncæ and for uncre sawle geornlicæ beo and brucæ heo þæs landæs at Batancumbæ hyræ dæg and æfter hire dæge ga hit an Ælfwærdes hand uncres suna gif hæ lifæs beo gyf hæ næ beo gyf hæ næ beo for mine broðorn to þa hwilæ þæ hi beon and æfter hyra dege ga into Glæstingabyrig for urnæ fædær and for uræ modor and for us eallæ And ic wullan þæt man gefreogen ælcne witeþeowne man on ælcum þæra landæ þæ ic minon freondon bæcwedden hæbbæ And þisseræ geþafiuncga þæ sæ cyning geuþæ is to gewitnæssæ Ælfþryþ þæs cynincges wif and Aþelwold bisceop and Ælfhære ealdorman and Æþelwine ealdorman and Ælfwinæ and Æscwig abbod