Charter Document - 06510080
| Charter Number: | 06510080 |
|---|---|
| Cartulary Title: | Charters of the Old Minster, Winchester |
| Charter Language: | English |
| Charter Origin: | Lay |
| Charter Type(s): | Will |
| Date: | 0946 - 0947 |
| Date type: | Assigned |
| Resource Link(s): |
eSawyer (S 1504) |
Charter:
Her geswutelad þæt Eadred cing geuþe þæt land at Wilig þa twelf hida to scrudfultume þam hirede into Ealdan Mynstre Leof Æþelwold ealdarman cyþ his leofan cynehlaforde Eadred cynge hu ic wille ymbe þa landare þe ic at mine hlaforde geearnode Ærest Gode and þære halgan stowe at þam bisceopstole at Wintanceastre þam bisceope and þam hiwum þæt land at Wilig þa twelf hida to scrudfultume þæt hi me on heora gebeddredenne hæbben swa swa ic him to gelyfe and þam cinge minne hæregeatwa feower sweord and feower spæra and feower scyldas and feower beagas twegen on hundtwelftigum mancosun and twegen on hundeahtatigum and feorwer hors and twa sylfrene fata and minum breðer Eadrice þæt land at Oceburnan and at Æscesdune and at Cegham and at Wessingatune and Æþelstane minæ breðer þet land at Bradanwætere and þet at Niwantune and Ælfsige mine broðorsuna þet land at Carcel and Ælfstanes suna mines broþor þæt land at Cleran and eall þæt yrfe þæ ic hæbbe on lænelandum þonne wylle ic þæt þæt sie gedeled for mine sawle swa swa ic nu þam freondum sæde þæ ic to spræc