Charter Document - 06510063
| Charter Number: | 06510063 |
|---|---|
| Cartulary Title: | Charters of the Old Minster, Winchester |
| Charter Language: | Latin |
| Charter Origin: | Royal |
| Charter Type(s): | Confirmation |
| Date: | 0937 |
| Date type: | Internal, A.D. |
| Resource Link(s): |
eSawyer (S 439) |
Charter:
Quia regum gesta antecessorum laudabilia religiosorum et principum justorum qui veritate et justitia caritate et misericordia florentes gentem suam moderamine regali rexerunt et quod bonum est in oculis Dei gesserunt regum et principum successorum tota sequi præcipitur diligentia eorum exempla prævia cunctis in posterum dilatare ut sic in illis impleatur quod scriptum est Multitudo sapientium sanitas est orbis terrarum Unde Ego Æþelstan totius luculentæ Britanniæ rex possessionem sancte Dei ecclesie Wentane quam proavus meus Aþulf rex justus et benignus Deo et sanctis apostolis Petro et Paulo obtulit rogante me venerabili Christoque amabili Ælphego ejusdem ecclesie pontifice in nomine sancte Trinitatis renovo tamque pro omnium præteritorum quam et futurorum regum Anglorum sed et pro cunctorum vivorum et mortuorum animabus Anglorum etiam et meæ ipsius anime pro redemptione ad præsens stabilio adjurans per regem celestem ut nullus regum nullusve principum eam immutare aliquando p[re]sumat Denique rex præfatus Aðulfus quia unus clericorum basilice Wentane ante regnum adeptus existens basilicam ipsam affectu peculiari quoad vixit amavit ditavit et sublimavit et iccirco cum consensu et benedictione universalis pape vallem illustrem Ciltecumb appellatam cum omnibus appendiciis et finibus suis huic inde dilatatis sicut qui hodie tenus supersunt dilucide norunt Christo et apostolis prætitulatis delegavit omnemque summam hereditatis huius pro una mansa in omni negotio et debito haberi statuit et ut nunquam majori servitio quam ab una exigitur mansa deserviat in nomine Christi interdixit Igitur hanc libertatem sic roboratam quisquis servitio graviori oppresserit Christum cum venerit in magistate sua cum angelis suis judicem iratum et sanctos apostolos Petrum et Paulum sanctos quoque omnes in ecclesia Wentana quiescentes ejusdemque ecclesie episcopos adversarios habeat nisi se nequiter egisse doleat rursumque dilecte Deo basilice amicus efficitur Wentane Anno siquidem incarnationis dominice DCCCCXXXVII qui præcessit annum quo bellum celebre in Bruningafelda factum fuit Æþelstano rege pro his et aliis multis beneficiis victoriam optinente libertas hæc renovata erat archiepiscopis episcopis ducibus et coadunatis qui omnes una maledictionem ei imposuerunt qui eam unquam immutaret