Charter Document - 06510060
| Charter Number: | 06510060 |
|---|---|
| Cartulary Title: | Charters of the Old Minster, Winchester |
| Charter Language: | English |
| Charter Origin: | Lay |
| Charter Type(s): | Will |
| Date: | 0931 - 0939 |
| Date type: | Assigned |
| Resource Link(s): |
eSawyer (S 1533) |
Charter:
Ic Wulfgar an þæs landes at Collingaburnan ofer minne dæg Æffan hiere dæg and heo tilige uncer begea sawla þearfe gemænelice ðæron and feormige þrie dagas þa Godes þeowas þær min lic reste on þone gemynddæg and selle þam mæssepreoste fif peningas and þara oþra ælcum twegen and ofer hiere dæg to Winteceastre þam Niwan Hierede for mine sawle to habbenne and to brucenne and na of þam mynstre to sellanne and ic an þæs landes at Ingepenne ofer minne dæg Æffan to brucenne and to bewitanne and þæt heo hæbbe ælce gere to þam tune ealra gearwæstma þa þrie dælas and þone feorþan to Cynetanbyrig þam Godes þeowum for mine sawle and for mines fæder and for mines ieldran fæder þonne ofer hiere dæg into Cynetanbyrig to þære halgan stowe for Wulfgares sawle þe ic hit in selle and for Wulfrices and for Wulfheres þe hit ærest begeat to habbenne and to brucenne and næfre ut to sellanne Þonne an ic þæs landes at Cræft ofer minne dæg Wynsige and Ælfsige and ealles þæs þe ic þæron begite and ic an þæs landes at Denforda ofer minne dæg Æþelstane and Cynestane gif hie me oþ þæt on ryht gehieraþ and ic an þæs landes at Butermere ofer minne dæg Byrhtsige twegea hida and Ceolstanes sunum anes gif hie me oððæt on ryht gehieraþ and ic cweþe on wordum be Æscmere on minum geongum magum swelce me betst gehieraþ and ic wille þæt Æffe feormige of þæm þrim dælum at Ingepenne þa Godes þeowas at Cynetanbyrig þrie dagas on twelf monþum ænne dæg for me oþerne for minne fæder þriddan for minne ieldran fæder and ic an þæs landes at Hamme Æffan ofer minne dæg and heo tilige þæron uncer begea sawla þearfe and feormige þrie dagas þa Godes þeowas þære min lic reste on Eastron and ofer hiere dæg into Winteceastre to þæm Ealdan Hierede to sancte Trinitate to hæbbenne and to brucenne and næfre ut to sellanne