Charter Document - 06510042
| Charter Number: | 06510042 |
|---|---|
| Cartulary Title: | Charters of the Old Minster, Winchester |
| Charter Language: | English |
| Charter Origin: | Religious |
| Charter Type(s): | Lease |
| Date: | 0902 |
| Date type: | Assigned |
| Resource Link(s): |
eSawyer (S 1285) |
Charter:
In nomine Domini Denewulf bisceop and þa hiwan in Wintanceastre leton to Beornulfa hiora landes xv hida at Eblesburnan wið þam gafole ðe he wið bisceop and wið hiwan ared ðæt is xlv scillingas to hærfestes emnihte sie simle agyfen on ða gerad ðæt hine nage nan man of to aceapienne ne his bearn æfter his dege þa [h]wile þe hi ða gerihta forðbringan a magen and eac ælce geare fultumien to þære cyrican bote þe ðet land to hyrð be ðem dæle þe ðet oðer fol[c] do ælc be his landes meðe and þa cyricsceattes mid rihte agyfe and fyrde and brycge and festengeweorc hewe swa mon ofer eall folc do and ðis wes gedon on ðara witena gewitnesse and ðafunge ðe hiora naman her benioðan standað awritene ðe geare ðe wes agan fram Cristes acennesse twa winter and nigan hund and ðet wes gedon on þære mæran stowe on Wintanceastre Bisceop lyfde Beornulfe his mege þæt he moste þa inberðan menn hamettan to Eblesburnan Nu hebbe ic hi hamet Lufe and hire ðreo bearn and Luhan and his seax bearn Ðonne geærendodon me ða hiwan on Wintanceastre ðet þa men mostan on þan londe wunien hæfde swa ic swa minra freonda swelce hit hæfde Þonne weron þær ðreo witeðeowe men burbærde and ðreo ðeowberde ða me salde bisceop and þa hiwan to ryhtre æhta and hire team Ðis wes gedon ða man þa cyricean halgode at Hysseburnan on ðara manna gewitnessa þe hira naman her beneoðan standað Ærest Denewulf bisceop And Tata prb And Beornstan prb And Wigea diac And Æþelstan prb And Eadwulf pr And Dyrewine pr And Wulfhere Cidding And Wulfstan pr And Eadulf cempa And Beorhtsige pr And Windsige pr And Ælfsige pr And Denewulf Bisceop And Tata pbr And Byrnstan pb And Eadstan Diac And Æþelstan pb And Eadulf pb And Ædelstan pb And Ælfstan pb And Wulfstan pb And Wigea pb And Wulfric pb And Eahtan pb And Winsige min And Wulfred min And Beorsige min And Ælfsige min And Eadulf min And Wulfhelm min And Wulsige min