Charter Document - 06510025

[O]n þæs naman þe on eces lifes bec on heofonan þa awrit þe her on life wel ge cwemaþ [I]c Aðvlf kyningc on ðysum ge write ge swutelie be Ciltacumbes fr[e]ulse ðone þe Kynegyls kyningc þe ærest kyninga cristen gewearþ on west Sexan his fulluht fæder Sancte Bir[in]e biscope ge uþe and siþþan ælc þæra kyninga þe æfter oðran on west Sexan wæron gefriðodon and gefyrðredon þeah þe he ær on gewrite ne stode oð hit to me com þe nu se nygoþa kyningc eom Eac ic her ge swutelie þæt ic þisne freols at foran sancte Petre on Rome and þam halgan papan Leone swa ge fæstnode swa swa me and eallan ðeod scype ge wearþ on Englalande ær ic to Rome fore þæt wæs þæt mon ælles ðises freolses are æfre for ane hide werian scolde for þam þe Godes ar æfre freogre beon sceal þonne ænig woruld ar and min sune eac Ælfred þe mid me for and þær to kyninge gehalgod wæs þan papan on hand ge sealde þæt he ðisne freols æfre ge fyrþrian wolde and his bearn gif him God ænigra ge uþe to þam ylcan sprittan wolde Ic eac beforan þam ylcan papan ealle þa land are þe ic on Angla þeode heafde Gode into halgan stowon for me and for ealle þeode geteoðode and on Rome be þes papan fyrþrunge and leaue mynster ge worhte Gode to loue and sancta Marian his halgan meder to wyrþmynte and þær Englisce scole ge sette þe æfre nihtes and dæges for ure þeode Gode þywian scolde and þa þa ic on eard com ic on cyððe ealle folce hwæt ic on Rome ge don hæfde þa þancodon hy þyses Gode and me swyþe georne and heom eall þis swyþe wel licode and cwædon þat heora þances þis on ecnesse stande Nu halsie ic þurh þa halgan þrimnisse and sanctus Petrus and ealne þane haligdom þe ic on Rome for me and for ealne þeodscype ge sohte þet næfre ne kyningc ne æþelingc ne biscop ne ealdorman ne þegen ne gerefa hine silfne swa earme for wyrce þæt he þisne freols ge lyttlie þe he swylcre ge wittnesse ge festnod is buton tweonan se þe hit deð he abilhd Gode and sancte Petre and eallæn þam halgan þe on Romes cyrcean restaþ and him seluan ece helle wite unge sæliglice getilaþ Eac se halga forsædæ papa Leo Godes curs and sancte Petres and ealra halgena and his on þæne ge sette þe þis æfre undo and eac eall þes þeodscype ge on ge hadodan ge on læwedan þæt ylce dyde þa ic on gean com and him þis cyþde