Charter Document - 06502152

Alexander episcopus servus servorum [] dilectis filiis Matheo de Alperino capellano nostro et officiali Trecenensi salutem et Apostolicam benedictionem Cum dilecti filii Spillatus Cambaii et Auverius Cose socii cives et mercatores Florentini pro se et Dino Perini Petro Bone Case et Mainetto Spine Jacobo Cambii et Rustico Cambii et ceteris eorum sociis civibus et mercatoribus Florentie venerabili fratri nostro episcopo Herefordensi nomine dilectorum filiorum abbatis et conventus monasterii de Waltham ordinis Sancti Augustini Londoniensis dioecesis renuntianti constitutioni de duabus dictis edite in concilio generali et omnibus literis et indulgentiis a sede Apostolica impetratis sive impetrandis ducentas marcas sterlingorum bonorum et novorum tres decem solidis et quatuor sterlingis pro marca computatis auctoritate literarum nostrarum apud sedem Apostolicam pro expediendis dictorum abbatis et conventus et monasterii negotiis mutuaverint certis eis locis et terminis persolvendas prout in instrumento publico exinde confecto plenius continetur discretioni vestre per Apostolica scripta mandamus quatinus si dicti abbas et conventus et successores eorum in statutis loco et terminis juxta instrumenti predicti tenorem ita quod nulla alia probatio vel certitudo super hujusmodi [debito] exigatur mercatoribus ipsis quibus pretextu alicujus constitutionis canonice vel civilis aut cujuscunque privilegii vel indulgentie de quibus plenam et expressam oporteat in presentibus fieri mentionem probandi necessitatem incumbere nolumus quod pecunia ipsa in utilitatem prefatorum abbatis et conventus et monasterii sit conversa de pecunia non satisfeceri[n]t memorata vos in dictum abbatem et successores ejus qui pro tempore erunt excommunicationis sententiam proferentes conventum ipsum sublato appellationis obstaculo subiciatis ecclesiastico interdicto et tamdiu abbatem et successores ipsius excommunicatos faciatis publice denuntiari singulis diebus Dominicis et festivis pulsatis campanis et candelis accensis donec prefatis mercatoribus de predicta pecunia cum justis et moderatis expensis ac debita restauratione dampnorum super quibus simplici verbo ipsorum mercatorum vel alicujus eorum sine aliqua alia probatione dicti abbatis et conventus credere teneantur usuris omnino cessantibus fuerit satisfactum Si vero dicti abbas et conventus in hujusmodi sententiis per duos menses permanserint ab administratione spiritualium et temporalium suspendatis eosdem prefigentes ipsis terminum peremptorium competentem quo abbas personaliter conventus vero per procuratores idoneos nostro se conspectui representent penam debitam pro meritis recepturi contradictores per censuram ecclesiasticam appellatione postposita compescendo non obstante si dictis abbati et conventui ab aliquibus aliis ex eisdem quod excommunicari suspendi vel interdici aut conveniri extra certas dioeceses vel ad solutionem aliquorum debitorum nisi creditores legitime probaverint ea in utilitatem predictorum abbatis monasterii aut conventus fuisse conversa compelli non valeant a sede Apostolica sit indultum et universis privilegiis vel literis apostolicis generalibus vel specialibus sub quacumque forma verborum optentis et optinendis et quibuslibet aliis per que id impediri vel differri valeat et de quibus et eorum totis tenoribus de verbo ad verbum plenam et expressam fieri oporteat in presentibus mentionem et constitutione de duabus dictis edita in concilio generali vel si dicti abbas et conventus cruce signati sint vel cruce signari eos contigerit et indulgentiis que a predicta sede cruce signatis generaliter vel eorum aliquibus specialiter sunt concesse vel in posterum concedentur Quod si non ambo his exequendis poteritis interesse alter vestrum ea nihilominus exequatur Datum Neapoli quarto kalendas Maii Pontificatus nostri anno primo