Charter Document - 06501131

Innocentius episcopus servus servorum Dei venerabilibus fratribus archiepiscopis et episcopis ac dilectis filiis abbatibus prioribus prepositis decanis archidiaconis archipresbyteris et aliis ecclesiarum prelatis earumque capitulis et conventibus seu collegiis tam exemptis quam non exemptis ac patronis clericis ac laicis presentes literas inspecturis salutem et Apostolicam benedictionem Postquam regimini generali ecclesie nos licet immeritos divina pietas voluit presidere cordi semper habuimus quod honestatem et ordinem in omnibus servaremus ac in provisionibus faciendis haberemus illius providentie modum per quem ecclesiis et monasteriis sive aliis piis locis honor et commodum perveniret Quod autem quandoque contrarium accidisse dinoscitur tum propter malitiam temporum tum propter improbitatem nimiam petitorum sepe nobis dolorem intulit et cordi nostro suspiria cumulavit Maxime cum post multa diffugia et excogitate resistentie studium provisiones quasdam prorsus inviti fecerimus quas potuisse vitare pro magno et sollempni gaudio duceremus cum itaque dudum fuerimus mente vigiles ut super his adhibere remedium possemus oportunum nos pro quiete mentis nostre ac pro ecclesiarum monasteriorum et locorum predictorum salute duximus statuendum quod singuli vestrum canonicas et prebendas ac beneficia seu personatus et dignitates cum cura vel sine cura redditus et etiam pensiones ad collationem aut electionem seu presentationem vestram spectantia que optinentur a quibuscunque oriundis extra regna in quibus habentur canonicatus et prebende ac alia supradicta seu apud sedem Apostolicam maneant seu alibi commorentur ex nunc personis idoneis Deum habendo pre oculis conferre vel eas ad illa eligere ac electas confirmare seu presentare et presentatas admittere sublato cujuslibet contradictionis et appellationis obstaculo valeatis et ex tunc persone ipse in eisdem canonicis et prebendis ac beneficiis seu dignitatibus et personatibus redditibus et pensionibus plenum jus et inconcussum optineant Nec tamen de his priusquam vacent se aliquatenus intromittant sed ea ipso jure quam citius vacaverint assequantur et ipsa intrandi ac retinendi nullius requisito consensu liberam habeant facultatem Ita tamen quod illi qui nunc ipsa optinent ea quousque cesserint vel decesserint pleno jure pacifice habeant et quiete ac nullum omnino super his pretextu statuti ejusdem prejudicium patiantur Volumus tamen quod si sub expectatione prebendarum in ecclesiis in quibus provisum fuerit dictis personis prius aliqui sint recepti vel si super provisione sua in eis literas Apostolicas impetrarunt sicut in receptione vel impetratione sic in prebendarum assecutione personis preferantur eisdem Si vero aliqua personarum ipsarum cui obtentu ejusdem statuti provisum fuerit vel ei juxta modum inferius annotatum contigerit de vestra liberali gratia provideri cedat interim vel decedat licitum sit vobis tam cito loco sui aliam idoneam subrogare ac successive hoc facere in cujus vis earundem cessione vel obitu personarum Sub divini tamen judicii obtestatione precipimus quod persone ipse contra possessores dictorum canonicatuum et beneficiorum ac prebendarum seu personatuum et dignitatum reddituum seu pensionum nullas insidias aut fraudem vel molestia sive quodcunque aliud inconveniens machinentur Alias autem ipso facto cadant ab omni jure eis super provisione hujusmodi adquisito cum dignum sit quod sicut gratia pro virtute tribuitur ita pena pro vitio compensetur Pro malitiis autem cohibendis que hujusmodi forsan occasione statuti oriri possent in mentibus perversorum volumus ut si aliquem cui subrogatio ejusdem statuti facta fuerit quod absit perimi contigerit quoquo modo taliter subrogatus possessionem sue provisionis non habeat nec aliquatenus apprehendat nisi prius Apostolicas vel ordinarii et aliquorum religiosorum virorum Deum timentium patentes literas optinuerit quod de morte sic occisi suspectus nullatenus habeatur Ceterum quia personis eisdem in grave posset redundare tedium quod vacationem canonicatuum et prebendarum ac aliorum predictorum per longa tempora expectarent ad hoc nostra desudet intentio ut de canonicis et prebendis ac beneficiis seu personatibus et dignitatibus redditibus et pensionibus ad vestram collationem aut electionem vel presentationem spectantibus que preter hujusmodi provisionem vestram vacant ad presens seu vacare contigerit dummodo nulli alii de jure competant liberaliter ac sine mora provideatis eisdem et postquam ipsarum loco alias personas idoneas quam citius subrogetis Ad hec statutum predictum quamvis juri oppositum quod pro causa legitima et salubri ad nullius requisitionem vel instantiam proprio motu fecimus plenam et inviolabilem firmitatem volumus optinere Sed tamen ad alias collationes et electiones seu presentationes quas a quocunque de cetero neri contigerit idem statutum nullatenus extendatur nec sanctionibus canonicis propter ipsum in posterum aliquod prejudicium generetur Preterea nulla privilegia vel indulgentie seu litere Apostolice sedis vel legatorum ejus sub quacunque forma verborum de cetero impetranda obsistant prefato statuto cum jam plenum jus per hujusmodi collationem aut electionem seu presentationem adquiratur personis eisdem et illud eis tolli non possit absque divini offensa nominis et sedis Apostolice injuria manifesta Nos enim nihilominus si aliquid super his contra prefatum statutum contigerit attemptari non solum irritum ac inane decernimus sed omnes qui contravenire presumpserint divine maledictioni ac nostre volumus subjacere Licitumque sit vobis universis et singulis tanquam nostris in hac parte ministris nostras seu legatorum nostrorum lacerare literas si que statuto ipsi contrarie vobis aut alicui vestrum fuerint presentate Canonicatuum insuper et prebendarum ac beneficiorum et aliorum predictorum possessio sicut predictum est nihilominus intretur ac retineatur libere non obstantibus literis memoratis Sepe dictum vero statutum ad pontificatus et abbatias ac alias regulares extendi volumus dignitates Vos itaque filii abbas et conventus statutum ipsum prout expedire videritis auctoritate nostra diligenter et fideliter exequi studeatis Datum Laterani tertio nonas Novembris Pontificatus nostri anno undecimo