Charter Document - 06501051
| Charter Number: | 06501051 |
|---|---|
| Cartulary Title: | Cartulary of St. Albans |
| Charter Language: | Latin |
| Charter Origin: | Religious |
| Charter Type(s): | Letter |
| Date: | 1242 |
| Date type: | Assigned |
| Resource Link(s): |
British Library - Cotton MS Nero D I (f87r) |
Charter:
Illustri principi domino H[enrico] duci Brabantie frater Jordanus vice minister fratrum Minorum regni Boemie et Polemie et frater A custos Prangensis et gardianus ejusdem loci una cum conventu orationes humiles et devotas Cum vestre generositatis eximia celsitudo hilaritati ordinis nostri sese propria benignitate inclinare non dedignetur effectum per affectum comprobatis Nimirum igitur sentientes vos habere zelum Dei et reipublice serenitati vestre presentibus duximus intimandum quemadmodum quidam barbari quos vulgariter Tartaros appellamus propter discrepantiam et incuriam principum et prelatorum confidenter discurrentes populos multos Christianos et prepotens regnum Hungarie et quinque ducatus Polemie in ore gladii consumpserunt Eliminato quidem dicte Hungarie rege et principali duce Polemie cum multis militibus interfecto quos immunitos invenerunt infra breve tempus non solum in predictis terris verum sed et in marchiis maxime ad regnum Boemie pertinentibus cedam maximam perpetrarunt magis in illa sua victoria dolo quam strenuitate vincentes siquidem cum sibi ex adverso arma sentiunt moveri sepe immo semper quasi fugam simulantes et recessum post pusillum revertentes furiosius invadunt et dimicant nulli parcentes sexui etati vel conditioni loca Deo sacrata prophanantes in eisdem cum mulieribus dormientes et ad sanctorum sepulchra jumenta sua alligantes et carnes sanctorum exponentes bestiis terre et volatilibus celi sola nominis sui formidine multos in fugam convertunt Curo igitur irato Deo dolus in manibus eorum prosperetur et numerus eorum diatim augeatur et de preambulis sibi faciant propugnatores quos vincunt et sibi subdunt confederantes videlicet de paganis hereticis et pseudochristianis infinitam multitudinem timendum ne tota Christianitas ruinam patiatur nisi pacato Deo et caritative fidelibus confederatis in vinculo pacis furor Dominicus avertatur quo Tartari diaboli satellites de terra viventium exstirpentur Quare vobis licet magna pericula perstricto tamen sermone vestram duximus exhortandam nobilitatem quatinus vos et alii principes et prelati et omnes orthodoxi et fidei Christiane emulatores tantis malis imminentibus in orationibus et jejuniis necnon et armorum et armatorum preparationibus occurratis festinanter ut spiritualibus et mundanis armis premuniti ab imminenti tempestate evadentes libertas Christiana valeat respirare Illi qui dicuntur Tartari devastaverunt jam Indiam majorem et minorem insuper regnum Persarum et in Ruscia lxxii principes pertransierunt deinde Hungariam Polomiam et ipsum dominum terre illius et innumerabilem populum peremerunt Et ante Ascensionem Domini Moraviam intraverunt ubi commorantur Preterea mulieres eorum in armis equitant et nulli parcunt Et que melius pugnat concupiscibilior habetur sicut in nostris que melius texere novit vel suere partibus plus desideratur vel que formosior Vale
Source (click image below to view full size)
