Charter Document - 06500172

Alexander episcopus [] carissimo in Christo filio illustri regi Anglie salutem et Apostolicam benedictionem Cum de tuis carissime actibus digna et honori congrua referuntur rumor hic clarus accedit nobis admodum placitus auditum demulcens aurium et cordis interiora delectans quod si qua forte prava et modestie regali contraria sinistra de te relatio vel fama turbulenta portaret obstupescerent utique sensus nostri et animus intra gravius sauciaretur amaritudine ob sincere vinculum caritatis Sane intellecto quod venerabilis frater noster Rofensis episcopus ex parte universitatis prelatorum et cleri Anglicani regni qui per potentiam regiam se suasque ecclesias in suis juribus et libertatibus deprimi asserunt ad Apostolicam sedem accedens super reformatione status dictarum ecclesiarum et ecclesiastice libertatis pro quibus alias tam felicis recordationis I[nnocentius] Papa predecessor noster quam nos etiam per nonnullos prefate universitatis nuntios fuimus sepe et sepius requisiti habebat aliquid coram nobis et fratribus nostris proponere juxta quod sibi fuerat a predicta universitate commissum per que forsitan fuisset fame tue maximo apud regni Sicilie incolas qui sperant per te ad antiquas eorum libertates reduci et sub tuo vigere in bono statu et conservari dominio plurimum derogatum nos cupientes quod honor et fama tua in omni integritate serventur quodque omnia penitus remove[rentur] que possent anime tue periculum generare ad instantiam venerabilis fratris nostri archiepiscopi Tharensis et dilectorum filiorum electi Saresbiriensis ac abbatis Westmonasterii Londoniarum nuntiorum tuorum necnon magistri Rustandi capellani nostri honoris tui fervidi zelatores ordinavimus quod prosecutio hujusmodi negotiorum ecclesie Anglicane pro quibus prefatus episcopus venerat differetur ad tempus insinuando eidem episcopo quod te ad omnia que liberum pacificum et tranquillum statum predictarum ecclesiarum respiciunt auctore Domino sic efficaciter inducemus quod non oportebit eum vel coepiscopos suos et alios prelatos tam seculares quam regulares regni tui propter hoc amplius laborare Ideoque serenitatem regiam de fratrum nostrorum consilio rogamus monemus et hortamur attente et sincera qua te in Domino caritate complectimur suadentes in remissionem peccaminum nihilominus injungendo quatinus premissa omnia infra tui claustra pectoris sollicita meditatione revolvens considerans etiam quod nunquam remittantur peccata nisi restituantur ablata quodque nil cuiquam deperit si restituat aliena quorum misera detentio vergit in salutis proprie detrimentum considerans quod tuo specialiter ad hoc accedente consensu ab universis archiepiscopis et episcopis dicti regni excommunicationis sententia in omnes illos prolata et per sedem Apostolicam confirmata esse dicitur qui ecclesias et ecclesiasticas libertates ac jura et consuetudines liberas earundem et maxime illas que in cartis tuis libertatum communium continentur quacunque arte presumpserint infringere violare diminuere seu mutare pensans etiam insuper quod coronationis tue tempore ad conservandum et confovendum jura et libertates hujusmodi te juramento prestito diceris astrinxisse omnes libertates immunitates ac liberas consuetudines cunctaque jura ac privilegia que predicti episcopi aliique prelati cetereque persone ecclesiastice necnon et ecclesie dicti regni habuisse noscuntur eis infra festum Resurrectionis Dominice primo venturum ob reverentiam Jesu Christi Qui te fecit oleo sacri crismatis christum Suum ac crucis honorem cujus es caractere insignitus pro anime quoque tue salute regia liberalitate restituas ita quod predictis archiepiscopis et episcopis prelatis religiosis et personis materia nulla remaneat conquerendi Verumtamen quia predictus episcopus prosecutionem dictorum negotiorum pro quibus ad presentiam nostram venit supersedere curavit juxta vestrum beneplacitum et mandatum apud predictam sedem tuam responsionem super predictis omnibus expectando magnitudinem tuam requirimus ut tuam in hac parte intentionem et quid super his proponas facere per tuas literas nobis non differas intimare Et quia nostra interest ecclesias et personas ecclesiasticas cum earum juribus et libertatibus secundum Deum et justitiam defensare scire te volumus quod nisi infra hujusmodi terminum predictum archiepiscopi episcopi et prelati ac persone ecclesiastice ad omnia eorum jura fuerint plenaria restituti ex tune nequaquam dissimulare poterimus quantumque personam tuam sincero diligamus affectu quin predicto episcopo audientiam prebeamus Datum Anagnie sexto idus Novembris Pontificatus nostri anno secundo