Charter Document - 06500164
| Charter Number: | 06500164 |
|---|---|
| Cartulary Title: | Cartulary of St. Albans |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1256 |
| Date type: | Internal, Calendar, Papal |
| Resource Link(s): |
British Library - Cotton MS Nero D I (f74v) |
Charter:
Alexander episcopus [] dilecto filio abbati monasterii Sancti Albani ordinis Sancti Benedicti Lincolniensis dioecesis salutem et Apostolicam benedictionem Credentes illa te erga personam nostram et Apostolicam sedem devotionis sinceritate fervere ut preces nostras etiam si eas pro extraneis dirigamus libenter effectui studeas mancipare firmiter speramus illas a te cum porriguntur pro notis et consanguineis nostris eo promtus adimpleri quo de sinceriori affectu procedere dinoscuntur maxime dum rogamus pro illis qui sue nobilitatis et familiaritatis intuitu prerogativa sunt specialis favoris et gratie preferendi Cum itaque dilectum filium Roffridum scolarem natum Alberti nepotis nostri propter sua et suorum merita speciali benivolentia prosequamur dilectionem tuam rogandam duximus attentius et hortandum quatinus provide pensans quod consulte agit et negotiatur salubriter qui talibus dexteram liberalitatis extendit quoniam a majoribus sibi consanguinitate conjunctis hec propensius attenduntur qui sic collata recipientes totaliter in se ipsis sibique per hoc benefieri specialiter reputantes recognoscunt impensa et extendentes secum id largitoribus plurimum obligatos grandia illis pro suis retribuunt et compensant considerantes etiam quod tunc superiores pro suis vehementius obligantur cum sponte illis beneficentie manus porriguntur ita quod non expectata presidentis coactione donatio grata fiat et benefactor ipso affectu operis affectum sue sincere prenuntiat voluntatis attendens insuper quod idem scolaris tibi et monasterio tuo per se ac suos esse poterit multipliciter fructuosus sibi ob reverentiam Apostolice sedis et nostram de aliquo ecclesiastico beneficio ad tuam collationem spectante si vacat ad presens vel quam cito ad id se facultas obtulerit liberaliter providere procures sciturus quod id gratum erit nobis admodum et acceptum Quin [im]mo eo gratius hoc habebimus quo ex devotione videbimus procedere potiori Certo namque argumento monstrabit quod multum ad nos et Romanam ecclesiam sinceritatem habeas si nostro in hac parte effectui studueris effectu consono concordare Et ut de nostra super hoc voluntate expressius tibi constet firma teneas credulitate quod exinde nos in tuis et monasterii tui agendis senties magis favorabiles et benignos et studebimus etiam alias tibi et ipsi monasterio cognita in hoc tui animi puritate grata vicissitudine respondere Datum Anagnie tertio nonas Julii Pontificatus nostri anno secundo
Source (click image below to view full size)
