Charter Document - 06500159

H[enricus] Dei gratia rex Anglie [] dilecto sibi magistro J[ohanni] de Camesane domini Pape capellano salutem Ad aures nostras noveritis pervenisse quod cum vobis in ecclesia de Wengrave que est de patronatu abbatis et monachorum Sancti Albani competenter provisum existat vos pretextu cujusdam mandati Apostolici a felicis memorie Innocentio Papa predicto abbati directi quod ecclesiam illam vobis in uberiorem commutaret data temporis oportunitate ipsum abbatem super ordinatione ecclesie de Herteburne Dunelmensis dioecesis ad presentationem prioris et conventus de Thinemue spectantis a venerabili patre W[altero] Dunelmensi episcopo ad instantiam nostram facta ad hospitalitatis beneficium in domo sua latius exhibendum et perpetuo sustentandum graviter et indebite molestaris trahentes ipsum abbatem extra regnum nostrum in causam contra sedis Apostolice privilegium quod habemus Et quia abbatiam Sancti Albani pre ceteris monasteriis a progenitoribus nostris regibus Anglie fundatis speciali dilectionis fedare complectimur molestiam dicti abbatis necnon injuriam et violentiam dicta privilegio nostro a vobis illatam equo ferre animo non possumus nec debemus vobis mandamus firmiter injungentes ne causam illam extra regnum nostrum ulterius prosequi presumatis contra privilegium memoratum sed patienter sustineatis quousque abbas et monachi vobis competentius providerint ut intendunt Inhumanum enim censetur ut quod ad hospitalitatem hujusmodi sustentandam sunt adepti per alicujus improbitatem nequiter auferatur Propter quod honori et utilitati vestre convenit ut taliter vos geratis quod contingat vos ad majus beneficium in regno nostro provehi illud debeamus favorabilius sustinere Teste meipso apud Franchingham ii die Aprilis anno regni nostri xl