Charter Document - 06500157
| Charter Number: | 06500157 |
|---|---|
| Cartulary Title: | Cartulary of St. Albans |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1256 |
| Date type: | Internal, Calendar |
| Resource Link(s): |
British Library - Cotton MS Nero D I (f71v) |
Charter:
Domino Pape rex Anglie salutem cum reverentia et honore Dilectionis prerogativa specialis qua inter cetera nostre ditionis collegia abbatem et monachos Sancti Albani Lincolniensis dioecesis carius amplexamur ad providendum utilitati et tranquillitati ipsorum cum opus est multipliciter nos inducit Cum igitur venerabilis pater Dunelmensis episcopus non absque consensu et consilio capituli sui ad sustentationem hospitalitatis que apud dictos abbatem et monachos specialiter vigere dinoscitur et ad quam suarum possessionum facultas sufficere nequiverat duas partes ecclesie de Herteburne Dunelmensis dioecesis ipsorum usibus interveniente consensu prioris et conventus de Thinemue qui una cum abbate predicto jus patronatus optinuerant in eadem et residuum usibus vicarii in ea ministrantis dudum caritative necnon et precum nostrarum instantia duxerit ordinandum magister Johannes de Camezane cui in ecclesia de Wengrave extat provisum pretextu cujusdam litere Papalis qua felicis recordationis Innocentius quartus predecessor vester ultimus sibi a dictis abbate et suo conventu ecclesiam suam predictam in beneficium uberius mandaverat commutari ipsos super dicta ecclesia de Herteburne in ipsorum grave dispendium et nostre mentis turbationem non modicam aggravat et molestat sed et causam ipsam in lesionem juris nostri et privilegiorum nostrorum extra regnum nostrum trahi procurans suppressa littera contra ipsos impetrata per quam in Anglia iidem abbas et conventus infra certum tempus in eadem litera comprehensum poterant conveniri et causa ipsa similiter ibidem terminari nullo sibi die infra dictum tempus prefixo causam eandem a suo judice nullis rationibus vel causis legitimis admissis ab eodem ad curiam Romanam nequiter optinuit remitti Sanctitati igitur vestre que nobis et nostris totiens extitit gratiosa cum quanta possumus affectione supplicamus quatinus monasterium supradictum quod et de nostro extat patronatu et vobis est immediate subjectum suo jure destitui non permittatis sed potius ordinationem predictam de consueta benignitate sedis Apostolice confirmare et in aliis ejusdem monasterii negotiis coram sancta paternitate vestra expediendis sibi favorem et gratiam impertiri velitis super quo vestris beneplacitis cum gratiarum actione multiplici uberius reddamur astricti Teste meipso apud Leystonam primo die Aprilis
Source (click image below to view full size)
