Charter Document - 06500153

Decanus de Hereforde dilecto et fideli suo Ricardo citatori salutem Mando tibi quatinus citas tales [] habentes ecclesiasticos proventus quod compareant coram priore de Northantone et Helia clerico gerentibus vices magistri Rustandi domini Pape capellani sub pena canonice districtionis die Mercurii prima post octabas Epiphanie apud Sanctum Albanum in ecclesia Sancti Petri cum omnibus arreragiis omnium suorum proventuum de anno preterito sub pena excommunicationis et ad satisfaciendum super suis beneficiis de anno presenti secundum tenorem Apostolici mandati Injungimus vobis in virtute obedientie qua sede Apostolice tenemini et juramenti prestiti quatinus diligenter et sine fraude inquiratis et si aliquid ecclesiasticum beneficium vel proventus fuerit minus juste taxatum vel taxatus et si aliquid hujusmodi inveneritis juste et legitime augeatis cujuscumque beneficium vel proventus sive religiosorum sive secularium et de taxatione legitima per vos facta nos certificetis Et sciatis quod interpretatione sedis Apostolice nomine proventuum ecclesiasticorum intelliguntur obventiones provenientes de maneriis ecclesiis et de aliis rebus personis ecclesiasticis deputatis Item moneatis omnes et singulos rectores vicarios necnon et omnes habentes ecclesiastica beneficia seu ecclesiasticos proventus in decanatibus vestris cujuscumque fuerint religionis vel conditionis seu sexus quod decimam imam paratam habeant sine aliqua diminutione sub pena excommunicationis personarum et sequestrationis die Lune proxima post Cineres in prioratu Sancti Andree exceptis monasteriis per episcopum mercatoribus obligatis quorum decima compensari debet in solutionem illius debiti Item ad hoc exactissime inquiratis de arreragiis taxationem factarum per episcopum Norwicensem anno preterito et siqui fuerint detentores eorum quicumque fuerint excommunicetis publice et solempniter per decanatus vestros quousque nobis de predictis arreragiis plenariter satisfecerint beneficia eorum vel non minus sequestrando Item sub sacramento predicto vobis injungimus quod de cruce signatis omnibus et singulis cujuscumque conditionis et sexus a tempore quo nobilis vir comes Cornubie rediit de partibus transmarinis diligentem et exactissimam faciatis inquisitionem si cruce signatorum mortuorum vota sint redempta per deputatos ad hec a sede Apostolica et quorum vota non sint redempta per deputatos compellatis eorum executores ad quos bona eorum pervenerunt quod ad nos veniant et vota redimant Item moneatis omnes a tempore supradicto cruce signatos sub pena canonica quod vota sua redimant scilicet qui tempore assumptionis fuerint habiles ad pugnandum nunc autem effecti inhabiles ex quacumque causa Item ad hec compellatis omnes illos qui crucem assumpserunt sub conditione ut pecuniam in subsidium Terre Sancte transmittent vel pecuniam promiserint propter veniam crucis habendam si non solverint quod veniant et satisfaciant et siqui mortui sint compellatis eorum executores vel saltem illos ad quos bona eorum pervenerunt facientes nobis habere nomina tam viventium predictis modis cruce signatorum vel promittentium quam nomina executorum mortuorum et nomina eorum ad quos bona defunctorum pervenerunt Item siqui cruce signati vel non cruce signati in statis suis voluntatibus aliqua de bonis suis in subsidium Terre Sancte reliquerunt vel penes aliquem deposuerunt que nondum executoribus negotii sunt soluta nobis reddatur sub pena excommunicationis penes quemcumque hujusmodi legata vel deposita resideant Item siqui crucesignati velint vota sua redimere veniant ad nos et redimant Item et que scripta sunt redemptione votorum publicentur singulis diebus festivis per singulas ecclesias singulorum decanatum Item ad hoc injungimus vobis sub prefato sacramento quod exactissime faciatis inquisitionem de omnibus et singulis indistincte legatis a quibuscumque in decanatibus vestris et quod in his inveneritis nobis constare faciatis []