Charter Document - 06500150

Sic respondit procurator domini Conradi in presentia domini Pape et fratrum suorum senatoris et concilii ad articulos datos contra ipsum cum esset ad hoc specialiter vocatus Hec omnia proponunt citra formam judicii cum nunquam fuerit dominus rex citatus sed tanquam zelator fame sue ad solum rumorem miserit pro sua innocentia ostendenda Primum Quod regno Sicilie interdicto supposito et rege anathematis vinculo innodato facit sibi celebrari divina et regni ipsius clericos ad celebrandum coercet claves Ecclesie contempnendo Quod cum non careat scrupulo heretice pravitatis de heresi et heresis suspicione intendit inquirere contra eum Responsio ad hoc quod dominus rex in contemptu clavium nunquam sibi vel aliis celebrari divina mandavit vel immiscuit se divinis sed cum ipsum in nullo conscientia remorderet nec remordeat quod contra sanctam catholicam et Apostolicam Romanam ecclesiam matrem suam cogitasset aliquid vel egisset posito quod aliquando divinis interfuit quod non fatetur in contemptu clavium sue fidei ut falso sibi impingitur sed ob fervorem amoris fidei Christiane omni devotione reverentia et honore ut verus Christianus et princeps catholicus poterat interesse pro cujus fidei orthodoxe irrefragabili veritate et caritate cum necesse fuerit paratus est exponere se et sua Addit etiam quod eo in Germania existente et postquam venit in regnum per nuntios aut per literas de excommunicatione que lata proponitur contra eum monitio denuntiatio aut citatio non pervenit ad eum Nec obstat ei quod dicitur fuisse anathematis vinculo innodatus cum ante excommunicationem aliquam si qua contra processit quam ignorat idem dominus rex Dei timore accensus dubitans ne [factum sit] ad in stantiam et falsam suggestionem proditorum et remulorum suorum et etiam patris sui qui ad summum Pontificem se contulerant post detectam proditionem et conjurationem quam in necem contrectaverint patris sui et falsa contra ipsum dominum regem cotidie confingere [non] cessabant coram suis proceribus tam in Germania quam in regno a quocunque gravamine legitime appellaverit et appellatione[m] ipsa[m] per suos sollempnes nuntios fecit sollempniter publicari sicut oportuno tempore probare poterit per legitima documenta Unde post appellationem suam legitimam si processum fuit processum fuit indebite contra ipsum nec credit se in aliquo ligari Ad id autem quod sibi impingitur videlicet quod regno interdicto quod dominus [rex] non fatetur compulerit clericos celebrare divina taliter respondetur quod eo veniente in regnum invenit clericos celebrantes et prout ipsos invenit sic eos celebrare permisit nullam alicui propter hoc correptionem vel violentiam inferendo Posito tamen quod super hoc alique litere contrarie apparerent dicit eas de sua conscientia minime emanasse sicut apparet evidenter per literas missas justitiariis et officialibus omnibus regni quam cito id ex fabuloso colloquio ad ejus pervenit notitiam quod idem probare vult tam per ipsas literas quam per legitima documenta ut nullus eorum aliquem clericum compelleret celebrare divina contra voluntatem suam Ad aliud capitulum quod opponitur subsequenter quod in terris Lombardie adherentibus et faventibus sibi publice heresis predicatur respondetur sic quod semper persecutus est dominus rex hereticos quarumlibet sectarum in Alemannia quamdiu moratus est ibi et postquam venit in regnum et paratus eos persequi tam in Lombardia quam alibi tanquam princeps catholicus et Christianissimus dolens quam plurimum quod non potest eos persequi cum effectu in partibus Lombardie sed ut constat publice toti mundo Mediolani Brisse et Mantue predicatur publice heresis quia salva reverentia presidentis dicuntur ecclesie filii speciales Ad aliud capitulum quod dicit quia favet Eccelino de Romano quem dominus Papa pro heretico reputat sicut ponit respondetur sic quod semper dominus [rex] hereticos [odit] nec unquam novit eum hereticum esse nec fuit nec favet ei tanquam hereticus Ad aliud vero quod nequissime et falsissime ponitur quod sanguinis fodere violato toxicare fecit Frethericum nepotem suum licet non videretur necessarium respondere ad tam manifestissimam et apertissimam falsitatem tamen ne simplices et vulgus quod de facili credere consuevit aliud crederet quam deberet dicit dominus rex quicquid super hoc per quemcunque sibi opponitur penitus esse falsum rite probabit Ad aliud capitulum consimilis falsitatis quod contra naturale amoris vinculum Henricum fratrem suum detinet captivatum dominus rex respondet quod nunquam dictum fratrem suum tenuit captivatum immo tractavit eum honorifice et dilexit ut fratrem et si hodie viveret faceret illud idem Sed Dominus in Cujus manu sunt omnium potestates et omnium corda regum prout Sibi placuit de hujus mundi ergastulo ipsum ad eternam patriam revocavit In cujus obitu partem sui corporis reputat diminutam Super eo vero quod in ipsorum capitulorum serie subsequenter adjungitur quod bona ecclesiarum vacantium et non vacantium ac domus Templi Hospitalis et aliorum religiosorum in regno occupavit et detinet occupata prelatos et rectores in ecclesiis ipsis canonice institutos non permittens in ipsis ecclesiis residere alios preficiens in eisdem respondetur quod bona ecclesiarum cathedralium vacantium et non vacantium in regno suo nec occupavit nec detinet occupata sed in ecclesiis ipsis vacantibus ipsius regni ratione antique dignitatis competentis sibi et predecessoribus suis tantum utitur jure suo faciens bona eadem per procuratores suos idoneos commode procurari Quod si videtur absonum Apostolice sedi contentus est dominus rex illo jure in predictis ecclesiis vacantibus quo nititur rex Francie et Anglie in ecclesiis vacantibus regni sui Ad hoc autem quod dicitur quod de bonis Hospitalis et Templi facit dissipationes taliter respondetur videlicet quod bona predictarum domnum nec occupavit nec detinet occupata sed si aliquis de dictis domibus velit conqueri de domino rege paratus est ei facere omne justitie complementum Idem respondet de bonis aliorum religiosorum locorum Ad id vero quod subdit quod prelatos et rectores institutos canonice in ecclesiis regni non permittit residere in ecclesiis ipsis sed alios preficit in eisdem taliter respondetur quod nullum in ecclesiis ipsis institutum canonice abjecit nec prohibuit in ipsis ecclesiis residere dicit quod in ecclesiis ipsis nullum prefecit sed in ecclesiis vacantibus sicut dictum est bona ipsarum facit per procuratores idoneos commode procurari prout competit ex antiqua consuetudine dignitatis quam habet in ecclesiis vacantibus regni sui Ad aliud autem quod dicit quod cum regnum ipsum sit sedis Apostolice dominus rex plura gravia presumpsit contra Romanam ecclesiam et presumit duras et abominabiles exercens ibi sevitias et alia pessima et enormia propter que si etiam dictum regnum pertineret ad eum deberet inde illo privari respondet dominus rex quod in regno Sicilie tanquam hereditario regno suo quod a predecessoribus suis a tempore quo non extat memoria ad eum legitima successione et continuata possessione pervenit nulla gravia presumpsit contra Romanam ecclesiam nec presumit nec sevitias aliquas exercuit vel exercet Sed cum regnum ipsum in bono et pacifico statu gubernans omnibus indifferenter monstrat justitie complementum Ad hoc autem quod dicit quod attemptat multa contra Romani imperii dignitatem respondet dominus rex quod contra Romani imperii dignitatem non attemptavit aliquid nec attemptat sed cum sit in Romanum regem electus legitime prout plene constat per legitima documenta in eodem imperio utitur jure suo Ad aliud quod vult et petit dominus Papa ut omnibus volentibus ire ad deponendum contra dominum regem inquisitionem quam intendit facere contra ipsum super capitulis supradictis dominus rex respondet quod cum nullo modo inquisitio super premissis debeat de jure procedere contra ipsum eo quod causa propter quam in talibus inquisitio debeat fieri non precessit videlicet fama publica que a bonis et gravibus ortum habuerit et non semel sed sepius nec ab emulis et inimicis prout jura canonica et civilia insinuant manifeste non tenetur dominus rex securitatem petitam prestare quia sic videretur annuere et consentire inquisitioni que de jure non debet fieri contra ipsum Subest etiam alia causa que juste movet et movere debet dominum regem quod petitam securitatem prestare non debeat quod cum angeli tenebrarum frequenter in lucis angelos se transforment et sub pretextu liciti illicita committere non verentur occasione hujusmodi possent alia tractare latenter que domino regi essent onerosa plurimum et dampnosa