Charter Document - 06500146

Innocentius quartus omnibus prelatis in regno Francie Anglie Scotie Wallie Hispanie et Hungarie constitutis Super specula [] Dolentes recolimus qualiter quondam pia ac sancta clericorum plantatio sue prime honestatis oblita a summo sanctitatis culmine ad ima descendit vitiorum Crebris quippe relatis aures nostras abhorrenda fama circumstrepit et inculcat assidue quod relictis quinimmo procul et abjectis philosophicis disciplinis ut ad presens de divina scientia taceamus tota clericorum multitudo ad audiendas seculares leges concurrit et quod magis est divini animadversione dignum judicii nunc in plerisque mundi climatibus ad ecclesiasticas dignitates honores vel prebendas nullus assumitur a prelatis nisi qui vel secularis scientie professor vel advocatus existat cum tales a talibus nisi alia suffragarentur eisdem essent potius repellendi Maxime cum philosophie alumni in ejusdem gremio tam tenerrime educati tam diligentissime imbuti tam excellentissime promti et edocti pre victus et vestitus penuria conspectum hominum cogantur fugere hic et illuc tanquam noctue latitantes et advocati nostri immo diaboli equis faleratis purpurati insidentes in fulgore auri in candore argenti in nitore gemmarum in olosericis stupentem re verberantes solem se non Crucifixi vicarios sed heredes Luciferi pretendentes quocunque ingrediantur de se spectaculum facientes laicorum indignationem et odium contra se immo quod magis est dolendum contra totam Dei ecclesiam provocant et incurrunt Dicunt enim laici Ecce homines qui non posuerunt Deum adjutorem suum sed in multitudine divitiarum suarum gloriantur quod animorum elationes et gestus incompositi satis comprobant et ostendunt Videtur siquidem adimpletum quod pagani presagio oculi fuerat figuratum Omnia nature prepostera legibus ibunt Non sic habenda fides Nec mirum Servit enim Sara et Agar imperat Affliguntur liberi et servi optinent principatum Volentes igitur tante insolentie morbo necessariam adhibere medelam ut plenius et perfectius Theologie studio insistatur que directe iter ostendit salutis vel saltem philosophicis disciplinis que etsi pietate careant tamen dirigunt ad sciendum et cupiditatis reddunt extorrem que et omnium malorum radix et idolorum servitus perhibetur hac irrefragabili constitutione statuimus ut nullus de cetero secularium legum professor seu advocatus quocunque in legum facultate singularis gaudeat preeminente privilegio speciali ad ecclesiasticas dignitates personatus prebendas seu etiam minora beneficia assumatur nisi in aliis liberalibus disciplinis sit expertus et vita et moribus commendatus existat cum per tales et ecclesie deturpetur honestas et sanctitas exulet et fastus et cupiditas ita regnent quod in cunctis sui lateribus gravem dolorem sentiat mater ecclesia admirandis ulceribus sauciata Si qui vero prelatorum contra hoc statutum salubre presumptione dampnabili aliquid attemptaverint factum suum noverint ipso jure et se illa vice potestate conferendi privatos Et si presumptionem iteraverint penam divortii a prelaturis suis poterunt formidare Preterea cum in Francie Anglie Scotie Wallie Hispanie et Hungarie regnis cause laicorum non imperatoriis legibus sed laicorum consuetudinibus decidantur et cum ecclesiastice sanctorum patrum constitutionibus valeant terminari et tam canones quam consuetudines plus confundantur legibus quam juventur precipue propter nequitiam fratrum nostrorum et aliorum religiosorum consilio et rogatu statuimus quod in predictis regnis leges seculares de cetero non legantur si tamen hoc de regum et principum processerit voluntate primo tamen statuto semper et irrefragabiliter in suo ordine duraturo Datum Rome