Charter Document - 06500133

Bonefacius permissione divina Cantuariensis archiepiscopus totius Anglie primas dilectis in Christo filiis subdecano Lincolnie et priori de Thorkesee salutem eternam in Domino Sententias excommunicationis suspensionis seu interdicti quas tulimus generaliter seu specialiter vel alias auctoritate nostra contra illos qui se nobis opponerent quominus per nos vel per officiales nostros jurisdictionem episcopalem in civitate et dioecesi Lincolnie exerceremus episcopatu Lincolnie vacante duximus relaxandas quoad illos qui ad presens in usu predicte jurisdictionis facto vel fraude se nobis non opponunt nec in posterum se opponent Quocirca vobis mandamus quatinus quoad predictos dictas sententias denuntietis auctoritate nostra relaxatas sententiis memoratis quoad illos qui nobis vel officialibus nostris contradicunt modo supradicto et in posterum contradicent in exercitio jurisdictionis memorate in suo robore duraturis Datum apud Croidene in octavis Sancti Martini anno Domini MCCLIII