Charter Document - 06500110

Universis presentes literas inspecturis J[ohannes] Dei gratia abbas Sancti Albani et ejusdem loci conventus Lincolniensis dioecesis ordinis Sancti Benedicti salutem in Domino sempiternam Noverit universitas vestra nos pro nostris et ecclesie monasterii et conventus nostri negotiis et necessariis utilitatibus fideliter peragendis apud Londoniam mutuo recepisse a Maneto Spyne et Girardo Riccobaldi mutuantibus pro seipsis et Hyspiliato Camby et Aringer Abadinger et ceteris eorundem sociis mercatoribus Florentinis centum et quindecim marcas bonorum novorum et legalium sterlingorum tres decem solidis et quatuor sterlingis pro marca qualibet computatis de quibus nos nostro et ecclesie nostre nomine bene pacatos notamus exceptioni non recepte et non numerate pecunie renuntiando Quas pretaxatas centum et quindecim marcas predictorum sterlingorum predicto modo et numero computandas eisdem mercatoribus per legitimam stipulationem et bona fide promittimus in solidis eis vel alteri eorum aut ipsorum socio aut procuratori has literas in solutione reddenti in crastino Sancti Luce Evangeliste quod erit in anno Domini MCCLIII apud Novum Templum Londonie nos plene soluturos et integre reddituros Quam si non reddimus pecuniam ut dictum est eisdem mercatoribus reddere promittimus infra quindanam dicti festi Sancti Luce Parisius ad domum Sancte Genovese quod si ut dictum est eisdem mercatoribus predicta pecunia restituta non fuerit in altero dictorum locorum terminis constitutis ex tunc inantea eisdem mercatoribus per eandem stipulationem et bona fide promittimus pro dampnorum et interesse recompensatione per singulos duos menses pro singulis decem marcis unam marcam predictorum sterlingorum predicto modo et numero computandam et expensis unius mercatoris cum equo et serviente ubicumque fuerit usque ad solutionem totius pecunie memorate Super quibus expensis stare et credere promittimus et debemus eorundem mercatorum vel alterius eorum socii aut procuratoris simplici verbo sine alia probatione cause cognitione aut judicis taxatione Quas damnorum et interesse recompensatione[s] et expensas eisdem promittimus in sortem dicti debiti nullatenus computare ac non detinere pretaxatum debitum sub pretextu recompensationis predicto contra eorum voluntatem ultra terminum prelibatum Et pro his observandis nos et successores nostros et bona nostra ecclesie nostre omnia mobilia et immobilia presentia et futura ecclesiastica et mundana ubicumque sunt vel erunt eisdem mercatoribus principales debitores et pacatores constituentes in solidis obligamus nostrosque proventus et redditus universos donec eis fuerit satisfactum Et renuntiamus in his exceptioni doli mali actioni in factum conditioni sine causa consuetudini et statuto privilegio clericatus et fori beneficio restitutionis in integrum appellationis remedio constitutioni de duabus dictis edite in concilio generali omnibus litteris et indulgentiis a sede Apostolica impetratis et impetrandis tam cruce signatis quam cruce signandis concessis et concedendis neque excipiendo proponere dictam pecuniam non esse conversam in utilitatem nostram et ecclesie nostre indulgentie regi Anglie concesse ne homines regni sui extra ipsum regnum trahantur per litteras Apostolicas non facientes de ipsa indulgentia mentionem cunctisque constitutionibus in Lugdunensi concilio factis et omni exceptioni et rei que possent obici in predictis quibus non obstantibus dicti mercatores nos a termino inantea in solutione deficientes possint in causam trahere et ubi libet per Apostolicas litteras convenire Promittimus etiam in verbo veritatis et sacerdotii hec omnia inviolabiliter observare In cujus rei testimonium presentibus litteris sigilla nostra duximus apponenda Datum apud Sanctum Albanum mense Septembris et publice in capitulo nostro anno Domini MCC quinquagesimo sexto