Charter Document - 06500104

Innocentius quartus episcopus servus servorum Dei venerabilibus fratribus universis patriarchis archiepiscopis et episcopi ac dilectis filiis abbatibus prioribus et aliis prelatis necnon capitulis conventibus et collegiis ecclesiarum salutem et Apostolicam benedictionem Et qualitas temporis quod diebus istis potissimum fuit ob eorum malitiam modis variis redimendum et nonnullorum instantia importuna extorsit quod de archiepiscopalibus vel episcopatibus seu abbatiis et prioratibus mandavimus per nostras literas in diversis partibus provideri sed sanius reputantes provideri ecclesiis presertim cum de ipsarum regimine agatur quam personis providendi et ordinandi canonice de premissis omnibus liberam illis ad quos predictorum electio ordinatio seu collatio sive provisio pertinet concedimus auctoritate presentium potestatem non obstantibus quibuslibet literis generalibus vel specialibus sub quacunque forma verborum super quorumcunque promotionibus vel provisionibus impetratis a sede Apostolica vel legatis ipsius aut etiam impetrandis seu reservationibus vel prohibitionibus aut nominationibus earundem litterarum auctoritate factis vel faciendis aut processibus per eas habitis vel habendis in posterum Que omnia volumus viribus omnino carere nos enim quicquid contra hujusmodi concessionis nostre tenorem et libertatem juris seu potestatis nostre in hac parte a quoquam hujusmodi literarum occasione factum est vel fuerit vel presumptum decernimus irritum et inane interdicti suspensionis et excommunicationis sententias si que literarum nostrarum pretextu late sunt hactenus relaxantes et quas deinceps promulgari contigerit censentes penitus nullas esse inhibitionibus per nos et legatos nostros super non eligendis prelatis in ecclesiis civitatum et dioecesum ecclesie Romane rebellium cum eas vacare contigerit generaliter factis nihilominus in suo robore duraturis Datum Perusii decimo kalendas Junii pontificatus nostri anno nono He litere publicate fuerunt eodem anno infra octavas decollationis Sancti Johannis