Charter Document - 06500101
| Charter Number: | 06500101 |
|---|---|
| Cartulary Title: | Matthei Parisiensis Chronica Major, Additamenta |
| Charter Language: | Latin |
| Charter Origin: | Religious |
| Charter Type(s): | Letter |
| Date: | 1251 |
| Date type: | Assigned |
| Resource Link(s): |
British Library - Cotton MS Nero D I (f122r) |
Charter:
Religioso et honesto viro amico carissimo et speciali Hospitalis fratri Gualtero de Sancto Martino Predicatori frater Guillelmus de Castro Novo Dei gratia sancte domus Hospitalis Jerusalem magister humilis et pauperum Christi custos salutem et paratam ad beneplacita voluntatem Quia intelleximus quod vestri gratia domum Hospitalis et fratres semper sincere dilexistis et ad ejus voluntates fideliter asperantis liberalitati vestre grates inde referimus copiosas significantes quod ex hoc nos et fratres omnes Hospitalis vobis debitores constituistis et habebitis ad quelibet beneplacita perpetuo obligatos De nobis si audire delectat notificantes quod per Dei gratiam cum triginta de fratribus nostris et aliis religiosis et secularibus multis domini regis Francie interventu de carcere Babiloniorum liberati decimo septimo die mensis Octobris civitatem intravimus Acconiam multitudinem maximam fidelium in captivitate Egipti relinquendo quam speramus cum Dei auxilio in proximo liberandam Inter Soldanos Babiloniorum et Alapensium discordia magna viget per quam confidimus quod si succursus militie de transmarinis partibus venerit conditio Terra Sancte prosperabitur et hostium superbia conteretur Vale
Source (click image below to view full size)
