Charter Document - 06500089

Innocentius episcopus [] venerabilibus fratribus archiepiscopo Cantuariensi ejusque suffraganeis salutem Ecclesie generalis disponente regimini Domino presidentes quanto ex hoc amplioris cure astringimur nexibus tanto plurium cogitationum perplexione distrahimur et eo plus meus nostra considerationum varietate diffunditur quo magis emergentium undique negotiorum multitudine occupatur Propter quod cum nostram agnoscamus impotentiam non immerito pertimescimus ne impositum nostre debilitatis humeris tanti onus officii minus sufficienter minusque officiose geramus tam grandis sollicitudinis tamque observande vigiliis repellende somnum negligentie immiscentes non ut expedit de summi Apostolatus culmine in vinea Domini speculemur Id autem animum nostrum in profundum intime ac anxie cogitationis immergit nostrumque cor acuto dolore discindit quod sancta mater ecclesia his temporibus et multiplicium intra se tribulationem pressuris atteritur ac persecutionum circumquaque insurgentium malleis flagellatur cum non solum hi qui nunquam eam matrem sue professione fidei agnoverunt vires exerceant contra ipsam sed quam multi etiam quos Baptismi regeneratione parturivit in filios effecti jam degeneratione privigni diversarum in eam armis impugnantium insurga[n]t Nam quod horribiliter hactenus Frethericus quondam imperator dictam ecclesiam furentis sevitie morsibus laniarat et quod adhuc ferali candescat rabie contra illam omnibus pene liquet Qui quanto celsiori dudum dignitate ipsa ecclesia operante prefulsit tanto majoris elationis spiritu intumescens gravius in eandem preconcepte malitie virus fundit exacuendo in interitum ejus gladium quem ab ipsa velut defensor ejusdem contra suos inimicos susceperit vibrandam Quam detestabiles etiam modos predictam ledendi ecclesiam plurimi nobiles et potentes Fretheritice forsitan calliditatis persuasione ne dicamus iniquitatis fermento corrupti nequiter adinvenerint et quam dolosas machinas nefanda sagacitate paraverint ad infringendam integritatem ecclesiastice libertatis neque nobis est [in]cognitum nec vobis quinimmo et proximis jam innotuit et remotis Quot autem et quantis aliis ubi libet afficiatur ipsa ecclesia injuriis vexetur molestiis et gravaminibus opprimatur ab illis etiam qui eam condigna honorificentia prosequi ejusque procurare quietem ac ipsam a suis oppressoribus oportuno munimine defensare deberent ex moderno ejusdem statu potest liquido comprehendi Terre insuper Sancte frequens excidium jugi apud nos memoria recensitum nostram animam continue tristitie telo transfigit In immensum quippe dolemus quod loca presentie Dominice sanctificatione dicata execratione Agarenite residentie prophana[n]tur Atrium nimium inundatione conspergitur lacrimarum quod terra ubi pius Jesus patienter passus humano compatiendo generi a perpetue illud passionis cruciatibus liberavit sub impiorum dominio nimiis exprobrata obprobriis dire oneribus premitur servitutis Multa denique Christianorum strages in diversis eorum regionibus Tartarorum feritate patrata et imminens nihilominus aliis illorum invalescente tirannide desolationis vastitas ab horrende nos valide mestitie lancea usque ad mentis interiora percellit Valde namque tristamur quod tot fidelium sanguinem Tartaricus vel potius Tartareus mucro eis parcere nescius devoravit Lugemus nimirum quod nondum ut audivimus satiatus adhuc Christiani populi anxietate satis solita necem sitit Harum quidem et aliarum adversitatum quam plurium perferimus gravitatem Ex his utique aliisque sinistris multiplicis nobis meroris materia cumulatur Nam si ad Orientalem plagam considerationis convertimus oculos ibi ecclesiam gravis plaga percussionis affligi conspicimus Et si ad partes Occidentales intuitum convertimus in illis etiam credi eam flagellis tribulationis multimode reperimus Quare divine Majestatis auxilium in Cujus manu superne ac inferiores sunt partes contra tot adversa ut illa Sua virtute submoveat attentis ac devotis et assidui est supplicationibus flagitandum Sed quia per nos ipsos tantummodo propter nostrorum insufficientiam meritorum id optinere nequimus nec possumus etiam apud Deum insistere precibus ut vellemus cum frequenter de suavi contemplationis silentio ad tediosum curarum strepitum importuna litigatorum rapiamur instantia necnon de speculationis interioris altitudine ad exterioris ima sollicitudinis imminentibus agendis innumeris cum simus omnibus debitores descendere compellamur providimus vestra super hoc omniumque Christi fidelium fore suffragia requirenda Ideoque universitatem vestram monemus rogamus et hortamur attente ac per Apostolica vobis scripta precipiendo mandamus obsecrantes per aspersionem sanguinis Jesu Christi quatinus attendentes quod omnipotens Dominus servorum suorum deprecationibus aures benignitatis accomodat sibi pro nobis et pro universali ecclesia ut in suo beneplacito dirigens actus nostros ipsam gubernet et protegat et ad statum semper provehat meliorem orationum jugiter sacrificia offeratis Et quia inter alia illud est Deo Patri acceptabilius in quo Sibi Jesus Christus Ejus Filius immolatur qualibet hebdomada saltim semel certum ad hoc statuendo diem missam pro Terre prefate liberatione ac ipsius ecclesie pace necnon predictorum Tartarorum fortitudine conterenda in vestris vestrarumque civitatum et dioecesum ecclesiis faciatis sollempniter celebrari clericis et laicis ut hujusmodi misse intersint premonitis diligenter Ad hec quoniam divina gratia quo plurimum fuerit postulata precibus eo facilius impetrari posse speramus facientes singuli vestrum in primo precipue festo cujuslibet mensis processionem in vestris civitatibus generalem clericis ipsarum et populis pariter convocatis et eis per vos et per discretos aliquos verbum Dei juxta datam vobis ab Ipso gratiam proponentes statum universalem dicte Terre ac rationabilem causam et claram justitiam ecclesie necnon inestimabilem prefati Fretherici nequitiam et injustitiam manifestam ac dictorum Tartarorum crudelitatem ac potentiam eisdem exponere plenaria procuretis ipsos monitis et exhortationibus sollicite inducendo ut ad Terre ipsius recuperationem opem grandem et operam efficacem impendant ac dictis et factis assistant eidem ecclesie tanquam matri Nullumque ipsi Fretherico verbo aut opere favorem tribuant publicum aut occultum cum tam ipse quam omnes fautores ejus quos in hujusmodi predicationibus denuntiari precipimus sint excommunicationis vinculo irretiti et prudenter cogitent ac studiosi provideant quod adjuvante Domino eorundem processus impedire valeat Tartarorum Simili quoque modo in castris oppidis et villis vestrarum dioecesum apud precipuas ipsorum ecclesias sicut melius expedire videbitis processionem et predicationem fieri jubeatis Nos enim vobis relaxandi misericorditer omnibus vere confessis et penitentibus qui ad hujusmodi predicationes et processiones accesserint xx vel xl dies juxta vestrum arbitrium de injuncta sibi penitentia concedimus tenore presentium potestatem Datum Lugduni octavo kalendas Octobris pontificatus nostri anno septimo