Charter Document - 06500084

Par la poissance de Deu le haut envoie del roi de la terre Chaam Achatay al roi grant de plusurs provinces noble cumbatur del mund glaive de Crestiente victoire et de religiun baptismal curune de genz ecclesiastres defensur de la loi Ewangeliste fiz roi de France acroise Dex sa seignurie e gard sun regne par plusurs anz e parface sa volunte enz la loi e el mund el teus dores e en celui kest avenir par la verite de la dame ki cunduit tuz hommes et tuz les Prophetes et les Apostles Amen C M saluz e beneicuns E io co proi ke il receive ces choses e ka lui soient agreables acertes e face Dex ke io voie tel roi noble ki est arivez E li hautz creaturs face ferro nostre decurs co est a saver nostre vie ki tuz jurs decline e est endecurs e face legerement ke nus nus asssemblosmes e une chose en pres cest salu Sace il ken ceste epistle nest nostre entente el qe le profit de la Crestiente et fortesce de la main le roi Crestien par lottroi de nostre Seignur e requer Deu nostre Seignur ke il doinst victoire de eus de la Crestiente e face a ceus avoir victoire sur ses adversaires ki despisent la croiz en apres de la part le roi haut hauce celui Dex co est a savoir de la presence de conyot Chaam e acroise Dex sa grandeur Nus somes venu avokes poer e mandement ke tuit li Crestien soient quite de servitute et treuage dangarie de paage e de choses semblables e soient a honur e a reverence E ke nuls nes toille leur possessiuns E ke les iglises destruite soient reedifiees e les tables soient restorees e ke nuls nose defendre ces choses ker il prient de quor repose e volentri pur nostre regne En cest hure venimes nus a ceste chose pur le profit de la Crestiente e pur la garde par lottroi del haut Deu Acrestes nus avom envoie ces choses par nostre loial message honorable Saphadin Mephat Davi e par Marc ki vus anuncient cestes bones nuveles e vus dient buche a buche les choses ki sunt entur nus li fiz recoive les paroles de ceaus e les croie en lur lettres li rois de la terre soit a honur en acroisement par sa grandur En apres il cumanda qen la loi de Crist ne soit nule difference entre les Latins e les Grius e les Hermins e les Nestorins e les Jacobins e tuz les autres ki aurent la croiz Kar cil sunt tuit une chose entre nus ensi requiruns nus ki li haut rois ne mette divisiun entre aus Mais sa pite e sa debonairete soit sor tuz les Crestiens e dure sa pite e sa debonairete de la desqe la fin de Maranatha e co sera bone chose par lottroie de nostre Seingnur