Charter Document - 06500069

Archiepiscopus Cantuariensis Petro de Sabaudia salutem Imperator in permaxima multitudine intravit Lumbardium et in recessu presentis nuntii fuit Cremone ubi Mediolanenses et alii rebelles imperii verba pacifica per legatos suos de die in diem proferre non cessant et creditur quod in brevi ei pacificabuntur Suessionensis et Trecensis episcopi pro se et pro omnibus prelatis regni Francie archidiaconus Torronensis prepositus Normannie pro capitulis et universitate cleri et dominus Ferricus Paste miles ex parte regis Francie in crastino Apostolorum Philippi et Jacobi venerunt ad curiam exponentes gravamina que regno Francie per ecclesiam Romanam inferuntur Primo de usurpatione jurisdictionum in cognitionibus causarum Secundo de judicibus executoribus ac conservatoribus Templariorum Hospitalariorum et aliorum religiosorum ac Romanorum et quorundam aliorum in regno Francie qui passim et indifferenter suspendunt inferiores et etiam superiores prelatos et alios clericos et laicos excommunicando et terras eorum interdicto supponendo nullatenus sine scandalo et gravi discrimine salutis eterne Tertio de beneficiis et pensionibus Ytalicis et aliis a Papa datis in regno Quarto de subventione imperii Constantinopolis Quinto de intolerabili subventione ecclesie Romane Sexto et ultimo de privatis legatis et nuntiis per provincias pro exactione pecunie destinatis His in presentia Pape et fratrum publice expositis a nuntiis antedictis sequenti die respondit Papa ad proposita Ad primum quod omnem usurpationem ab ecclesia noviter factam super jurisdictione temporali si aliqua esset quod tamen non credit paratus est loco et tempore revocare De illis autem de quibus ecclesia extitit in possessione vel quasi non intendit aliquid immutare Ad secundum ordinabit in singulis provinciis unum vel duos viros electos qui talia gravamina cum requisiti fuerint revocabunt Ad tertium possessa jam beneficia ah Ytalicis non revocabit sed pensiones et obtentas et etiam optinendas a quibuscunque personis revocabit expresse Ad quartum et quintum quod mittet literas et nuntium specialem ad proximum parlamentum in Franciam et ordinabit ita quod omnia procedent cum tranquillitate et pace ecclesie Ad ultimum quod omnes tales nuntios et legatos finaliter revocabit de cetero non reversuros auctoritate sedis Apostolice Tertia die recesserunt nuntii predicti indignati quia visum fuit eis quod minus sufficienter fuerat eis responsum Preterea nuntii baronum confederatorum in Francia contra ecclesiam quorum confederationi ipse rex Francie de novo ut dicitur in curia prebuit jam assensum per appositionem sigilli regalis una cum sigillis baronum eorundem ingressuri erant curiam proximis diebus sed nescitur que proponere debeant Verumtamen curia ista non creditur in adventu eorum ridere Speratur etiam a multis tam cardinalibus quam aliis curialibus in brevi reformatio imperatoris cum ecclesia Dicitur enim quod ecclesia ulterius non potest sustinere pondus diei et estus et quod in ejus depositione nimium fuit ecclesia per concilium circumventa et preceps et minus circumspecta Preterea versus partes Germanie nullus stat pro ecclesia nec cum ecclesia post mortem Landegravii sed omnia cedunt voluntati regis Conradi Dicitur etiam quod Tartari reversi sunt super regnum Hungarie In recessu presentium portitoris alia non dicebantur in curia relatione digna Verumtamen adventus imperatoris multum timetur a Papa et cardinalibus sed non ab omnibus cardinalibus Quidam enim eorum levissime gerunt ut videtur captionem Gregorii de Montelongo legati Lumbardorum similiter et Stephani Bardenensis electi nepotis Pape quos rex Gallure et Turris nuper cepit et tenet captivatos una cum toto thesauro ecclesie qui in subsidium Lumbardorum mittebatur per eosdem magna parte cardinalium contradicente Et dicitur quod predictus nepos Pape traditus est dirissimis questionariis per quos dicitur ipsum multa esse confessum nisi pax citius reformetur in obprobrium sempiternum ecclesie Romane que poterunt redundare Vale