Charter Document - 06500067

Innocentius episcopus servus servorum Dei venerabilibus fratribus archiepiscopis et episcopis et dilectis filiis abbatibus prioribus decanis archidiaconis prepositis archipresbyteris et aliis ecclesiarum prelatis ad quos litere iste pervenerint salutem et Apostolicam benedictionem Novum matris ecclesie gaudium novi sancti celebritate jocunde leti referimus grande a celesti collegio de college novi consortio agi festum exultanti animo nuntiamus Gaudet quidem ecclesia se talem ac tantum produxisse filium qui alios et sacre conversationis exemplo dirigat et percepto jam beatitudinis premio firmam spem eis tribuat de salute Letatur nimirum se tam clara sobole illustratam que digno ab omnibus attollenda preconio et devota veneratione colenda manifeste declarat ad hereditatis eterne participium admittendos qui ecclesiam ipsam matrem fide ac opere profitentur et nullos in supernam posse gloriam nisi per eam tanquam regni celorum clavigeram introire Gaudet celestis patria nobilis habitatoris adventu expertumque colonum fidei suis incolis noviter adunari Exultant cives celibes de celebris aggregatione concivis de condigno celi consorte nuper ipsis adhibito psallunt sancti Exurgite igitur et vos fidei zelatores et una cum ecclesia matre vestra letamini de magnificentia et exaltatione confratris Affluit gaudio et spem tutam assumite de condi gena terrenorum facto compatriota celestium Exultate ingenti letitia quod novellus vobis apud Deum patronus accrevit quod adest coram ipso pro salute vestra placidus intercessor En siquidem beatus Edmundus archiepiscopus Cantuariensis salubriter pensans ad factorem suum facturam affectu dirigi naturali naturamque collapsam reparatorem debere recognoscere proprium Creatorem et Redemptorem suum affectuose et studiose quesivit Recte namque intentionis lumen bajulans ad ipsum perfectorum operum processit gressibus salutis semitam aliis et splendore vite ac doctrine claritate demonstrans Unde horum trium intentionis pure perfecti operis et recti sermonis dulci concordia velut delectabili psallens tripudio tribus hostibus carne mundo demone virtute perseverantie superatis digne meruit verre fidei secure spei et fervide caritatis ternario insignitus summe Trinitatis arce trino electorum virginum scilicet continentium et conjugatorum ordine preparata palma victorie honorari Etenim ut de suis actibus aliquid referamus licet ipsius vita quo plenius exponitur eo relatoris gustui plus dulcescat magisque delectet animos auditorum ab annis teneris Dei Filium tenere diligens Eum postmodum tenere corde non desiit quia Ipsum tenelle mentis tabule stilo recte considerationis inscripsit Quinimmo quanto majori profecit etate tanto pleniori cognitione in amorem Ejus exarsit et ne fervor spiritus sue carnis extingueretur ardore sed mortificatione potius accenderetur ipsius assidui eam asperitate cilicii edomans ejus libitum arcte abstinentie nexibus alligavit ut non suo ducta voto sed spiritus voluntate ad licita tute pergeret et provide ab illicitis declinaret Nam districtis corpus maceravit jejuniis antiquorum observantie novorum austeritatem que sibimet ipse idem indixerat superaddens dum deliciosorum ciborum oblectatione despecta refectione contentus humilium communium jejuniorum temporibus a permissis etiam elegit jejunare cibariis et ceteris insuper in hebdomada diebus amplius abstinere Sompni quoque prolixitatem odiens diuturnis vacabat vigiliis et excusso torpore orationi sedulo insistebat Cubilis enim spreta mollitie ne requie delicata lentesceret veste illam membris indulgebat jacendo quietem ut brevi sopore refectus protinus surgeret seque genuflexionibus et orationibus diutius deputaret Ab initio autem viarum suarum sic munde usque in finem incedere studuit quod mundi vitato lubrico in lutum non defluens voluptatis munditie nitore prefulsit Quid amplius Contrivit fragile carnis vasculum ut in eo thesaurum anime sibi creditum cautius conservaret Doctor vero preclarus ac predicator eximius et auditorum mentibus scientie lumen infudit et pectoribus fidelium avulsis vitiorum tribulis semina virtutum injecit Humilitate quippe sublimis mansuetudine placidus patientia fortis benignitate affabilis pietate condolens misericordia innocens et multiplici elemosinarum irriguo in subventionem affluens egenorum Et ut gestorum suorum multitudinem succincta relatione texamus sic Jesum firma credulitate cognovit et agnitum sincero corde dilexit ac dilectum totis votis ambivit quod mundo et eis que in mundo sunt penitus vili pensis ad celestia cunctis studiis inhiavit satagens se suo nomini actibus coaptare ut sicut vocabatur Edmundus sic se vel a criminum labe mundum vel e mundo abductum seu extra mundi amplexus positum operum testificatione probaret Unde tanquam spiritualis omnino Edmundus a carnis contagiis in extremis agens et corpus Christi sibi delatum reverenter adorans hec verba omni attentione notanda mira protulisse compunctione aperte monstratur Tu es in Quem credidi Quem predicavi Quem docui et Tu testis es mihi quia nihil aliud nisi Te Domine in terra quesivi sicut Tu scis quod nihil volo nisi quod Tu vis fiat voluntas Tua Verum cum vivens Dei ecclesiam preclaris illuminasset meritis mortuus sue sibi claritatis radios non subtraxit sed cum functus hac vita verius viveret quam vixisset eam postmodum illustravit fulgore luminis plenioris Non enim voluit Dominus sanctitatem mundo supprimi tanti viri quin sicut pluralitate innotuerat meritorum sic miraculorum diversitate pateret ut qui tota Ipsum devotione coluerat jam Secum regnans venerabiliter coleretur Nam cecis lumen restituit et quod est gloriosius de cujusdam oculis innate cecitatis tenebras infusi visus perspicuitate fugavit Alii cujus linguam natura diutina taciturnitate ligaverat liberam loquendi tribuit soluto silentio facultatem Leprosam quandam squamis lepre mox decidentibus subita et mirabili abstersione mundavit Tremula paralitici membra firmavit consolidatione nervorum contractis artuum extensione subvenit Tumentem hydropisim corporis extenuatione curavit Et quandam senilis etatis veteri gibbo imis inflexam restituit erecta sursum ejus facie sanitati His et aliis compluribus coruscavit miraculis manifestis quorum seriem non duximus presentibus inserendam Convalescit ex ipsis fides catholica Judeorum pertinacia erubescit Confunditur hereticorum fallacia et obstupescit ignorantia paganorum Cantet itaque Cantuariensis ecclesia laudis divine canticum quod inter alias modernis temporibus venerabilibus est decorata patronis unius quidem rubricata martirio et confessione alterius candidata Exultet pleno gaudio fertilis Cantuaria quod ab ecclesie sue area tam purum granum transmisit ad horrea summi Regis Letetur et Pontiniacense monasterium quod talium et tantorum patrum meruit honorari presentia dum unus diu ibi degens illud sue vite nobilitavit moribus et alter illuc accedens ipsum reddita celo anima sui corporis thesauro ditavit ut quasi adimpleretur quod ipse gloriosus martir Thomas videlicet post longam moram quam exilii sui tempore in eodem continuavit monasterio cum ipsis monachis de multa honorificentia caritative sibi ab eis exhibita respondere juxta sui voti plenitudinem non valeret dixisse asseritur quod esset sibi aliquis successurus qui dignam ipsis retributionem rependeret pro eodem Porro quia quos omnipotens Deus perpetue corona glorie in celum magnificat summe devotionis studio ab hominibus in terris convenit venerari ut quo sollempnius fideles sanctorum memoriam agimus eo dignius ipsorum patrocinium promerentur nos de sanctitate vite ac veritate miraculorum ejusdem Sancti E[dmundi] curiose inquisitionis sollempnitate ac districti examinis discussione premissis plenarium certitudinem optinentes ipsum de communi fratrum nostrorum et prelatorum omnium tunc apud sedem Apostolicam existentium consilio et assensu in Dominica de Adventu qua cantatur Gaudete in Domino semper sanctorum catalogo ascribendum duximus vel jam ascriptum potius nuntiandum Ideoque universitatem vestram monemus et exhortamur attente per Apostolica scripta precipiendo mandantes quatinus decimo sexto kalendas Decembris cum tunc felix ipsius anima de carnis liberata carcere ad astra conscendens aulam celestem adiverit Paradisi deliciis fruitura festum ejusdem devote ac sollempniter celebretis et faciatis vos fratres archiepiscopi et episcopi per vestras civitates et dioeceses a Christi fidelibus veneratione congrua celebrari ut pio ejus interventu et hic ab eminentibus possitis periculis erui et in futuro salutis premium consequi sempiterne Ceterum ut ad venerabile ejus sepulchrum ferventius et copiosius Christiani populi confluat multitudo ac celebrius ejusdem sancti agatur sollempnitas omnibus vere penitentibus et confessis qui cum reverentia illuc in eodem festo annuatim accesserint ipsius suffragia petituri de omnipotentis Dei misericordia et beatorum Petri et Pauli Apostolorum ejus auctoritate confisi unum annum et quadraginta dies accedentibus vero annis singulis ad predictum sepulchrum infra ejusdem festi octavas quadraginta dies de injuncta sibi penitentia misericorditer relaxamus Datum Lugduni tertio idus Januarii pontificatus nostri anno quarto