Charter Document - 06500048

Religiosis viris et universis sancte matris Ecclesie fidelibus presens scriptum visuris vel audituris F Dei gratia humilis abbas Sancte Marie totusque conventus ejusdem loci ordinis Sancti Benedicti in Hungaria commorantes consolationem Paracliti cum salute quam promeruit Sanctus Benedictus et gloriam sempiternam Latores presentium fratres B et J sacerdotes domus nostre monachos vestre commendamus caritati quos de claustro Sancte Marie in Ruscia in Hyberniam transmittimus gratia commorandi Et hoc per inopinatum adventum Tartarorum qui dicuntur Ysmelite pro dolor compellimur faciendum Heu mater Ecclesia gemens et dolens de filiis Deo famulantibus qui dispersi [sunt] per diversas nationes gentium propter Tartaros [qui] in pervenientes inopinate fines orientales potenter intraverunt et maximam hominum partem ibidem habitantium peremerunt Insuper bona ecclesie nostre et redditus fratrum quibus sustentabantur totaliter devastaverunt et dicitur quod quadraginta duo anni sunt elapsi ex quo recesserunt a montibus in [quibus] clausi tenebantur Qui de locis maledictis ut credimus progredientes provincias Asie bestialiter devastando quatuor reges cum principibus ejusdem terre inhumaniter mactaverunt Regem etiam Capadocie valde potentem regem Persarum cum suis tribunalibus similiter xxv duces in Ruscia potentissimos ducem H[enricum] Polemie pie memorie cum quadraginta milibus hominum una die quasi in momento interfecerunt Preterea magnificum regem Hungarie Bela nomine fugaverunt archiepiscopos tres et quatuor suffraganeos et sexaginta quinque milia hominum Et in eodem bello regem Colomannum predicti regis fratrem vulneraverunt letaliter ita quod mortuus est post breve tempus Deinde proficiscentes ad fines nobilis ducis Austrie S[t]yrie Marchie Tarvisie Morannie et Boemie in Natali Domini Danubio congelato cum magna fortitudine ad alteram partem fluminis transmearunt predictorum principum terras vastando omniaque feraliter per circuitum exterminando nulli parcentes sexui inenarrabilia perpetrant impudenter In ecclesiis cum mulieribus suis dormiunt et de ceteris locis Deo sacratis pro dolor stabula faciunt jumentorum Quorum insolentia Deo irato in tantum invaluit quod prelati archiepiscopi scilicet episcopi abbates principes et vulgus ineffabile ante in effrenatos barbarorum principes fugiunt nihil aliud nisi mortem expectantes monachis monialibus predicatoribus interfectis lamentabiliter morientes pro Christi nomine effecti martyres ut credimus eterne beatitudini sociantur Unde caritatem vestram humiliter imploramus quatinus his ad vos confugientibus sinum aperiatis misericordie Datum Vienne anno gratie MCCXLII pridie nonas Januarii His quoque temporibus propter terribiles rumores hujusmodi celebriter hi versus Antichristi adventum nuntiantes recitabantur Cum fuerint anni transacti mille ducenti Et quinquaginta post partum Virginis alme Tunc Antichristus nascetur demone plenus