Charter Document - 06500042

Clemens episcopus servus servorum Dei dilectis filiis Garino abbati et fratribus Sancti Albani salutem et Apostolicam benedictionem Ex officio generalis provisionis compellimur et debitum nos caritatis inducit omnium ecclesiarum sed precipue religiosorum qui se ad Dei servitium voti professione ac exhibitione operum astrinxerunt affectibus aspirare et siquid in capite vel in membris committitur quod in dispendium eorum redundare aliquatenus valeat auctoritate Apostolica prohibere Cum excelsis autem monasterium vestrum occasione fidejussionis per Abbates et Priores cellarum ad vestrum monasterium pertinentes seu monachos jacturam incurrere possit non modicam et gravamen auctoritate qua dante Domino premonemus tibi fili abbas et tuis successoribus districtius inhibemus ne cuilibet vestrum vel Prioribus aut monachis cellarum pro aliquo omnino hominum fidejussioni se liceat obligare Preterea quoniam aliquandiu etiam occasione debitorum que ab ipsis Prioribus et monachis contrahuntur preter licentiam et consensum abbatis monasterium ipsum et celle ere alieno gravantur volentes earum indemnitati attentius providere auctoritate Apostolica inhibemus ne cui monacho vel Priori pecuniam mutuo recipere vel pro mutuata ab altero aliquatenus se liceat obligare nisi de mandato abbatis sui hoc fecerint vel aliqua cogens necessitas vel evidentissima ecclesiarum utilitas hoc exigeret faciendum Si vero priores cellarum vestrarum vel monachi vobis professione subjecti propria quod absit auctoritate muniti pecuniam qualemcunque mutuo abbate suo inconsulto et non permittente acceperint nisi cogat necessitas prout dictum est vel evidentissima ecclesiarum utilitas hoc poposcerit abbas qui pro tempore fuerit aut monasterium nullatenus absolvendum illam pecuniam teneatur Adicimus etiam et presenti vobis pagina indulgemus ut ab Adventu usque ad Nativitatem Domini et a Septuagesima usque ad Dominice Resurrectionis festum in precipuis sollemnitatibus occurrentibus Gloria in excelsis Deo vobis liceat solemniter decantare Decernimus ergo [] Datum Laterani xiv kalendas Junii