Charter Document - 06500038

Clemens episcopus servus servorum Dei dilectis filiis Garino abbati et fratribus Sancti Albani salutem et Apostolicam benedictionem Apostolice sedis auctoritas cui disponente Domino presidemus nos propensius ammonet et inducit viros religiosos et loca in quibus Domino famulantur brachiis caritatis amplecti et eorum jura protectionis Apostolice munimine confovere qui ad jurisdictionem beati Petri et nostram nullo mediante noscuntur specialiter pertinere Hac itaque ratione inducti et vestris postulationibus nihilominus inclinati vobis et per vos ecclesie vestre duximus indulgendum ut nulli archiepiscopo vel episcopo sive legato nisi a latere summi Pontificis misso licitum sit abbatem Sancti Albani aut Priores cellarum sive monachos ad concilium sinodum vel capitulum convocare vel ab eis obedientiam aut in ipso monasterio vel cellis adjacentibus aliquam exigere consuetudinem hospitandi sed nec in vos aut servientes vestros aliquod jus nisi ex speciali mandato Apostolico exercere Nolumus enim ut alicui licitum sit alicujus legationis pretextu ministeriales vestros sine capituli vel majoris et sanioris partis consensu a suis officiis removere et in eorum locum alios subrogare nec vos contra tenorem privilegiorum que ab Apostolica sede vobis sunt et successoribus vestris indulta audeat quomodo libet molestare Ad hec ab Apostolice sedis dementia adicientes ut cum personas aut vicarios ecclesiarum vestrarum in quibus jura pontificalia non habetis continget decedere nullus archiepiscopus vel episcopus vel officialis aliquis claves ecclesiarum illarum presumat accipere vel tenere et bona earum in proprios usus convertere sed liberum sit vobis in eis presbyteros subrogare qui a vobis amministrationem temporalium a dioecesanis autem episcopis curam recipiant animarum Preterea tibi fili abbas et tuis successoribus indulgemus ut monachos qui ab ecclesia Sancti Albani ad regimen aliarum ecclesiarum assumpti fuerint si quod absit in suo regimine vitiosi inventi fuerint liceat vobis de errore suo cum consilio fratrum vestrorum corrigere et sicut justum fuerit emendare Quos si post vestram ammonitionem incorrigibiles extiterint et rebelles cum consilio capituli vel majoris et sanioris partis consensu licitum sit vobis a suis officiis amovere et ad vestrum monasterium revocare et in consueto ordine conversionis claustri et capituli collocare Prohibemus autem ne aliquis episcopus sive archiepiscopus in cellis vestris exactiones aliquas vel ordinationes audeat facere sive aliquod jus vel officium episcopale in eis contra privilegii vestri tenorem exercere presumat per quod fratrum claustralium quies valeat quomodo libet perturbari Decernimus ergo ut nulli omnino hominum liceat hanc paginam nostre constitutionis et concessionis infringere vel ausu ei temerario contraire Siquis autem hoc attemptare presumpserit indignationem omnipotentis Dei et beatorum Petri et Pauli Apostolorum Ejus se noverit incursurum Datum Laterani xviii kalendas Maii pontificatus nostri anno primo