Charter Document - 06500036

Clemens episcopus servus servorum Dei dilectis filiis Garino abbati et fratribus Sancti Albani salutem et Apostolicam benedictionem Cum vos et monasterium in quo Domino deservitis ad jurisdictionem beati Petri et nostram nullo constet mediante spectare dignum est et omnino conveniens ut sub nostra et ecclesie Romane protectione ita quieti sitis et ab aliorum jurisdictione ac molestatione securi quod nullus archiepiscopus vel episcopus aut alius quislibet ecclesie prelatus vos absque speciali mandato Romani Pontificis preter quem episcopum nullum habetis valeat aggravare aut tanquam sibi subditos aliquatenus judicare Inde siquidem est quod nos paci et tranquillitati vestri paterna sollicitudine providere volentes et vos sicut speciales et devotos ecclesie Romane filios speciali privilegio communire vobis et per vos monasterio vestro ac cellis vestris auctoritate Apostolica indulgemus ut nullus archiepiscopus vel episcopus seu alius quilibet ecclesie prelatus fratres vestros Priores scilicet cellarum vestrarum vel alios monachos in cellis aut custodiis villarum vel alibi ubicumque morantes preter Romanum Pontificem et legatum cardinalem a latere ejus missum discutere vel judicare ab officiis divinis suspendere sive interdicti vel excommunicationis sententia quomodo libet aggravare sed tam Priores et monachi quam et ambitus cellarum suarum ab episcoporum subjectione ita Liberi et immunes existant tanquam in corpore vestri monasterii morarentur nec aliquis eos preter abbatem qui in monasterio vestro pro tempore fuerit sine auctoritate et speciali mandato summi Pontificis judicare audeat vel punire sive in cellis vestris vel minimum jus exercere Statuimus etiam ut fratres vestri in obedientiis permanentes cum commune interdictum terre fuerit exclusis excommunicatis et interdictis clausis januis et non pulsatis campanis suppressa voce sibi et conversis ac servientibus suis et devotis divina officia celebrent et eis debita peragant sepulture In parochialibus autem ecclesiis vestris et in quibus jura pontificalia non habetis liceat vobis presbyteros eligere qui ab episcopis dioecesanis si idonei fuerint curam animarum absque venalitate et pravitate suscipiant et eis de spiritualibus vobis autem de temporalibus omnibus respondeant Quibus cum tamen assigna veritis unde victus et vestitus habere possint necessariaque in ipsis ecclesiis honeste ministrare cetera omnia liceat vobis in usus necessarios ecclesiarum vestrarum convertere Ad hec auctoritate Apostolica interdicimus ne cuilibet archiepiscopo vel episcopo in monasterio Sancti Albani vel infra fines parochie ipsius monasterii sed neque in cellis eidem monasterio pertinentibus licitum sit ordines celebrare sive conventum aliquem vel processionem facere aut hospitium ex debito exigere regem etiam coronare seu episcopale officium in aliquo exercere presumat nisi id de vestra faciat voluntate Decernimus ergo [] Datum Laterani idus Aprilis