Charter Document - 06500033

Clemens episcopus servus servorum Dei dilectis filiis Garino abbati et fratribus Sancti Albani salutem et Apostolicam benedictionem Cum vos et monasterium vestrum in quo Domino deservitis ad jurisdictionem beati Petri et nostram nullo mediante constet spectare dignum est et omnino conveniens ut sub nostra et ecclesie Romane protectione ita tuti sitis et ab aliorum jurisdictione ac molestatione securi quod nullus archiepiscopus vel episcopus aut alius quaslibet ecclesie prelatus vos absque mandato vel auctoritate Romani Pontificis preter quem episcopum nullum habetis valeat aggravare aut tanquam sibi subditos aliquatenus judicare Inde siquidem est quod nos paci [et] tranquillitati vestre paterna sollicitudine providere volentes et vos sicut speciales et devotos ecclesie filios speciali privilegio communire vobis et per vos monasterio vestro ad instar felicis recordationis Alexandri Pape predecessoris nostri auctoritate Apostolica indulgemus ut nullus archiepiscopus vel episcopus seu alius quislibet ecclesie prelatus fratres vestros Priores scilicet cellarum vestrarum vel alios in cellis aut custodiis villarum vel alias ubicumque morantes preter Romanum Pontificem et cardinalem legatum ab officiis divinis suspendere sive interdicti vel excommunicationis sententie quomodo libet subicere audeat sed omnes ab episcoporum subjectione ita liberi et immunes existant tanquam si in corpore vestri monasterii morarentur Nec aliquis eos preter abbatem qui in eodem monasterio vestro pro tempore fuerit sine auctoritate vel mandato ecclesie Romane judicare valeat vel punire Statuimus etiam ut fratres vestri in obedientiis permanentes cum commune interdictum terre fuerit exclusis excommunicatis et interdictis clausis januis non pulsatis campanis suppressa voce et conversis ac servientibus suis divina possunt officia celebrare nullius contradictione obstante In parochialibus autem ecclesiis quas tenetis et in quibus jura pontificalia non habetis liceat vobis sacerdotes eligere electos dioecesano episcopo presentare quibus si idonei fuerint episcopus absque venalitate et pravitate aliqua curam animarum committat ita quidem quod ei de spiritualibus vobis autem de temporalibus debeant respondere Ad hec auctoritate Apostolica interdicimus ne quislibet archiepiscopus vel episcopus in monasterio Sancti Albani vel infra fines parochie ipsius monasterii sibi jus quodlibet vendicare sive conventum aliquem seu solemnem facere aut exigere processionem regem etiam coronare seu officium episcopale in aliqua cellarum suarum exercere nec hospitium in eis presumat exigere nisi id de vestra faciat permissione et voluntate Sancimus preterea ut cum monasterium vestrum abbate fuerit destitutum liceat Priori Sancti Albani cum consilio capituli vel majoris et sanioris partis ejus Priores et monachos cellarum si evidens necessitas institerit vel ipsarum cellarum utilitas postulaverit exinde ammovere vel ibidem ponere sine alicujus contradictione Sane siquis vobis et monasterio vestro possessionem aliquam vel aliud beneficium rationabiliter conferre voluerit ejus concessionem nullus ausu temerario impedire presumat Decernimus ergo ut nulli omnino hominum liceat hanc paginam nostre constitutionis infringere vel ei ausu temerario contraire Siquis autem hoc attemptare presumpserit indignationem omnipotentis Dei et beatorum Petri et Pauli Apostolorum Ejus se noverit incursurum Data Laterani viii idus Aprilis pontificatus nostri anno primo