Charter Document - 06500031

Clemens episcopus servus servorum Dei dilectis filiis Garino abbati et fratribus Sancti Albani salutem et Apostolicam benedictionem Merito debent dignitatis privilegio et libertatis prerogativa gaudere et abundantiorem gratiam apud sedem Apostolicam invenire qui nullo mediante ad curam et provisionem sacrosancte Romane ecclesie noscuntur specialiter pertinere Ex affectione siquidem prelatorum manifeste perpenditur quam sit jocunda et accepta devotio subditorum Unde quia monasterium cui auctore Deo preesse dinosceris ob reverentiam pretiosi sancti martyris Albani a Romana ecclesia et a regibus Anglie multam libertatis et gratie prerogativam optinuit nos ei quas habet libertates et honores volentes pro officii nostri debito diligentius conservare tibi et per te successoribus tuis auctoritate Apostolica indulgemus ut clericos super quos habere jus pontificale dinosceris ad suscipiendam correctionem tuam et disciplinam cum aliqui eorum excedunt et ad obedientiam et reverentiam debitam exhibendam et ad respondendum tibi tanquam domino et prelato suo in quibus debent nullius contradictione sive appellatione obstante compellere valeas et in contumaces et rebelles animadversionem debitam exercere Preterea tibi et per te successoribus tuis commissa nobis auctoritate duximus indulgendum ut in omnes depredatores vel malefactores ecclesie tue ut eorum que ad ecclesiam ipsam pertinent nisi ad tuam vel prelatorum ecclesiasticorum quorum parochiani fuerint legitimam commonitionem satisfacere voluerint et episcopi ad quos pertinent eos infra quadraginta dies postquam eos canonice premonueratis ecclesiastica districtione cogere noluerint ecclesiasticam possitis libere sententiam exercere quam usque ad condignam satisfactionem firmiter precipimus observari Ad hec ex Apostolica clementia adicientes quod presbyteros vel clericos concubinarios in ecclesiis ad monasterium Sancti Albani vel cellis eis pertinentibus ministrantes si ad episcoporum in quorum dioecesi fuerint et tuam noluerint infra quadraginta dies exhortationem a se suas focarias abicere et postmodum caste vivere liceat vobis illos ammovere et alios dum modo idonei sint ecclesiis illis de assensu dioecesani episcopi vel illius qui vices episcopi gesserit si vacaverit sedes preficere ita tamen predictos concubinarios vobis sit licitum ammovere si eos non amoverint episcopi super hoc a vobis prius canonice requisiti Decernimus ergo [] Data Laterani tertio kalendas Aprilis