Charter Document - 06481123
| Charter Number: | 06481123 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1315 |
| Date type: | Internal, Calendar, Episcopal |
| Resource Link(s): |
Borthwick Institute - Register 8 (f111v) |
Charter:
Willelmus [] dilecto filio Thome de Cresaker salutem gratiam et benedictionem Quia per inquisitionem legitimam nuper auctoritate nostra factam nobis constat evidenter quod domina Beatrix de Hodeshake quondam monialis de Caldestreme dioeceseos Sancti Andree in Scotia de licentia prelati sui ejusdem dioeceseos episcopi et Priorisse sue dicte domus ab eisdem domo et dioecesi ex justis et rationabilibus causis recessit et de licentia bone memorie Thome quondam Eboracensi archiepiscopi predecessoris nostri anachoritam se fecit in domo juxta pontem ville Doncastre in qua de nostra permissione hactenus moram fecit nos attendentes quod Priorissa et Moniales dicte domus de Caldestreme propter instantem guerram Scottorum bonis suis per eosdem Scotos dirutis ac etiam devastatis et asportatis ab eadem domo sua totaliter sunt disperse adeo quod dicta domina Beatrix ad prefatam domum suam durante dispersione hujusmodi redire non poterit inibi moratura Considerantes insuper quod ratione cujusdam terre et tenementi quod tenetis ex ordinatione antecessorum domini Willelmi filii Willelmi militis fundatoris domus duarum Anachoritarum juxta predictam villam Doncastre ad solvendum et prestandum eisdem duabus anachoretis decem quarteria frumenti annuatim estis efficaciter obligati nolentes talem et tam piam elemosinam ad sustentationem duarum pauperum mulierum salubriter ordinatam nostro tempore deperire tenore presentium vos monemus quatenus prefate domine Beatrici durante mora sua ibidem quinque quarteria frumenti pro sua portione et alteri anachorite alia quinque prout ex dicta ordinatione et fundatione ac consuetudine antiqua et approbata tenemini efficaciter annis singulis liberetis sub pena districtionis canonice quam si huic monitioni non parueritis cum effectu contra vos tanquam contra nervum discipline ecclesiastice contempnentes justitia previa curabimus exercere Et quid super his duxeritis faciendum nobis citra festum Beati Matthei Apostoli per vestras literas constare faciatis Valete Data apud Camesale xij die mensis Augusti pontificatus nostri anno decimo