Charter Document - 06481058
| Charter Number: | 06481058 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1291 |
| Date type: | Internal, Calendar, Papal |
| Resource Link(s): |
Borthwick Institute - Register 4 (f106r) Reference Document for this Embedded Document |
Charter:
Nicholaus episcopus servus servorum Dei venerabili fratri [] archiepiscopo Eboracensi salutem et Apostolicam benedictionem Inter cetera contenta in nostris literis quas tibi per venerabilem fratrem nostrum [] Tripolitanum episcopum super negotio Terre Sancte dirigimus habetur expressum ut tu et prelati tue provincie tam regulares quam seculares tumque exempti quam non exempti quos per te [prout in eisdem exprimitur literis] ad provinciale concilium volumus convocari celeriter convenientes in unum et deliberantes sollicite super toto negotio supradicto nobis quod super his in eodem fuerit deliberatum concilio per viros idoneos et discretos ac sufficienter instructos propter hoc ad sedem Apostolicam destinandos usque ad festum Purificationis Beate Virginis primo venturum studeatis quam citius intimare prout in eisdem literis tu et iidem prelati videbitis plenius et seriosius contineri Quia vero propter impedimenta varia et diversa et viarum discrimina que in itinere frequenter concurrunt prefatus episcopus sic festinanter ad partes ipse fortasse non poterit pervenire tibique dirigere literas supradictas ut infra predictum festum eodem celebrato concilio et deliberatione secuta hujusmodi tui et prelatorum ipsorum nuntii ad Apostolicam sedem personaliter valeant se conferre volumus et per Apostolica tibi scripta mandamus quatenus receptis nostris literis supradictis quamcito poteris concilium celebres memoratum et deliberationem ipsius per viros idoneos prout superius est expressum dilatone submota qualibet nobis una cum prelatis eisdem significare procures Data apud Urbem Veterem vij Kalendas Octobris pontificatus nostri anno quarto