Charter Document - 06480163

Johannes episcopus servus servorum Dei ad firmam rei memoriam vocatis nobis licet insufficientibus meritis ad Apostolatus officium occurrit quasi confestim considerationis nostre conspectui acerbis infesta molestiis periculosa dissensio que inter carissimum in Christo filium nostrum Edwardum regem Anglie illustrem et dilectum filium nobilem virum Robertum de Brus gerentem se pro rege Scotie jamdudum incentorem malorum quoniam suscitavit amaras nobis suas circumstantias quas frequenter dum nos minor status haberet intra pectoris claustra revolveremus representans Hinc etenim se offerebant et offerunt nostris obtutibus impedimentum proinde facile receptura pia Dei negotia et precipue Terra Sancta deserte ab incolis Christi fidelibus ipsorumque destitute suffragiis cui catholicis principibus distractis ad bella civilia consolator aliquis non assistit ex omnibus caris suis Hinc se ingerebant et ingerunt animarum pericula Christiani sanguinis non levis effusio gravia rerum dispendia et non solum ipsorum dissidentium suarumque gentium sed et quam plurium aliorum in ipsorum convocatione periculosa turbatio pariter et damnosa Hec quidem nostri cordis intima stimulant acutisque stimulis nostrum interpellant officium ut ad occurrendum per opportuna remedia tanto religionis Christiane discrimini ocius exsurgamus Attendentes igitur quod ad nos qui licet immeriti vices Regis pacifici gerimus ac plenitudine fungimur potestatis Apostolorum principi suisque successoribus ex alto concesse singulariter pertinet in universali ecclesia cunctaque congregatione fidelium pacem querere ac ipsam facere diligentius observari inter prefatos regem Anglie ac gerentem se pro rege Scotie auctoritate Apostolica treugas quarum fedus imaginem pacis inducit indicimus usque ad biennium duraturas ac in eos et omnes et singulos eorum adjutores vali tores consiliarios sequaces complices et etiam adherentes treugas infringentes easdem vel quomodolibet non servantes excommunicationis sententiam promulgamus non obstante si regi et gerenti predictis aut ipsis adherentibus seu cuivis eorum a sede Apostolica sit indultum quod excommunicari non possint per literas sedis ejusdem non facientes plenam et expressam ac de verbo ad verbum de indulto hujusmodi mentionem et qualibet alia dicte sedis indulgentia generali vel speciali cujuscunque tenoris vel expressionis existat per quam effectus presentium impediri possit vel quomodo libet retardari Treugas autem et sententiam antedictas a die notificationis seu publicationis ipsarum suum effectum volumus obtinere Vassallos insuper et subditos regis et gerentis predictorum a juramento fidelitatis quo eis vel eorum alteri tenentur astricti quantum ad hujusmodi guerre seu dissensionis articulum cum in illicitis eis obedire non debeant per idem tempus absolvimus Et nihilominus permissiones et obligationes que inter regem et gerentem predictos et quoscunque alios super belli seu conflictus utrinque committendi processu necnon confederationis colligationes et pactiones que inter ipsum regem et quovis alios ex una parte ac predictum gerentem et alios quoscunque ex altera intervenerint pro ipsa fovenda discordia utpote contra bonum pacis presumptas illicite et attemptatas in Divine majestatis offensam et quascunque penas adjectas ac juramenta prestita super his sub quibuscunque forma modo vel expressione verborum presertim cum juramentum vinculum iniquitatis esse non debeat ex nunc nulla fore decernimus et quatenus de facto processerint irritamus Nulli ergo omnino hominum liceat hanc paginam nostre indictionis promulgationis absolutionis constitutionis et [] tionis infringere vel ei ausu temerario contraire si quis autem hoc attemptare presumpserit indignationem Omnipotentis Dei et beatorum Petri et Pauli Apostolorum Ejus se noverit incursurum Data Avinione kal Maii pontificatus nostri anno primo