Charter Document - 06480157
| Charter Number: | 06480157 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1315 |
| Date type: | Internal, A.D., Calendar, Episcopal |
| Resource Link(s): |
Borthwick Institute - Register 8 Part 2 (f20r) |
Charter:
Willelmus [] dilectis filiis [] Decano et Capitulo ecclesie nostre Ebor salutem gratiam et benedictionem Intellecto nuper quod nuntii domini nostri regis ad partes Scotie transmissi ad tractandum cum Scotis de treugis seu via aliqua pacis inter hec duo regna infecto negotio redierunt nec in aliquam convenire poterant sufferentiam sive treugam quodque iidem Scoti ad partes istas Boreales ecclesias et personas ecclesiasticas ac bona tam spiritualia quam temporalia hostili impugnatione et armata potentia invadendum jam ut firmiter a multis vere dicis asseritur dirigunt gressus suos cum nonnullis nobilibus et magnatibus istarum partium pro tuitione patrie et defensione ac personarum certo die in ecclesia nostra Beati Petri Ebor ad hoc congregatis colloquium habuimus et tractatum iidemque nobiles et magnates unanimiter consenserunt quod pro defensione patrie et ecclesiarum in istis partibus existentium contra eosdem Scotos donec dominus noster rex et magnates regni manus apposuerint adjutrices pro viribus exponerent se et sua dum tamen a clero nostro [quia ipsorum bona per se ut asserunt non sufficiunt] adjutorium habeant et juvamen nos itaque attentis memorabilibus periculis que tam ecclesiis quam personis et bonis ecclesiasticis in istis partibus existentibus si ipsorum Scotorum malicie et invasione nequaquam celeriter occurratur evenire in proximis verisimiliter formidamus ne eedem ecclesie et persone ecclesiastice nobis subjecte ipsarumque bona indefensa relinquantur inimicis capitalibus et publicis latronibus invadenda concessimus pro nobis et clero nostre dioeceseos quem propter e vicina pericula tunc non potuimus ad id convocare quod de bonis ecclesiasticis quibuscunque spiritualibus et temporalibus ejusdem cleri nostri tam de personis et locis exemptis quam non exemptis cum dicta imminentia pericula tangant omnes duo denarii de singulis marcis secundum taxationem decime nunc currentis in subsidium defensionis patrie et ecclesie contra Scotos leventur plenaria citra instans [festum] Beati Petri in Cathedra Quam quidem concessionem nostram predictam clerus nostre dioeceseos postmodum acceptavit Quocirca devotionem vestram in Domino requirimus et hortamur quatenus de dignitatibus et prebendis singulis dicte ecclesie nostre Ebor duos denarios de singulis marcis juxta taxationem predictam citra festum Sancti Petri predictum levari et colligi faciatis et ipsos salvo faciatis custodiri nobis liberandos cum inde ex parte nostra fueritis requisiti Qualiter autem presens mandatum nostrum fueritis executi nobis constare faciatis citra dictum festum per vestras patentes literas harum seriem continentes Valete Data apud Cawod xvj kalendas Februarii anno gratie millesimo CCC quarto decimo et pontificatus nostri nono