Charter Document - 06480156
| Charter Number: | 06480156 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Commission |
| Date: | 1315 |
| Date type: | Internal, Calendar, Episcopal |
| Resource Link(s): |
Borthwick Institute - Register 8 Part 2 (f106r) |
Charter:
Willelmus permissione Divina [] dilecto filio magistro Johanni Gouer rectori ecclesie de Queldrike sacra theologia doctori salutem in omnium Salvatore Cum pro defensione et conservatione ecclesiarum terrarum locorum personarum et bonorum ecclesiasticorum et temporalium nostre dioeceseos ab hostili Scotorum incursu qui sicut alias fecisse noscuntur ausu nefario et sacrilego regnum Anglie ingredi et precipue ecclesias terras et loca nostre dioeceseos hostiliter invadere ac in eisdem depredationes depopulationes cedes incendia et alia enormia scelera in brevi committere fama referente publica comminantur multi nobiles ac etiam populares apud North Alverton die Lune in festo Sanctorum Fabiani et Sebastiani auctore Domino debeant congregari de vestre circumspectionis industria plenius confidentes vobis tenore presentium committimus et mandamus quatenus die Lune predicto tempestive congregationi predicte personaliter intersitis et compendiose proposito verbo Dei omnes ibidem presentes et alios subditos et parochianos nostros hortari et efficaciter inducere studeatis ut de commissis suis vere contritis et confessis contra dictorum Scottorum hostiles incursus pro defensione ecclesia et patria viriliter se opponant hocque ipsis vice et auctoritate nostra in suorum remissionem peccaminum injungatis Nos autem absolvendi omnes illos qui de peccatis suis vere contriti fuerint et confessi qui ad defensionem predictam parati exstiterint etiam in casibus nobis a jure specialiter reservatis vobis hac vice specialem concedimus potestatem eisdem omnibus et singulis xl dies de injuncta sibi penitentia relaxantes In quorum omnium testimonium sigillum nostrum presentibus literis duximus apponendum Valete Data apud Cawod xix kalendas Februarii pontificatus nostri anno nono