Charter Document - 06480154
| Charter Number: | 06480154 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Indulgence |
| Date: | 1315 |
| Date type: | Internal, A.D., Calendar, Episcopal |
| Resource Link(s): |
Borthwick Institute - Register 8 Part 2 (f106r) |
Charter:
Willelmus permissione Divina Ebor archiepiscopus Anglie primas dilecto filio ac religioso viro Priori de ordine Fratrum Predicatorum Ebor salutem gratiam et benedictionem Nefanda scelera et horrenda facinora que dominus Robertus de Brus miles ac ceteri Scoti sui complices et fautores tamdiu committere nullatenus formidarunt nonnullas partes regni Anglie ecclesias maneria et bona ecclesiastica hostiliter invadendo ac ruinis et incendiis supponendo cedes homicidia et publica latrocinia et depopulationes ausu sacrilego enormiter perpetrando pacemque et tranquillitatem regni presumptione damnabili perturbando non credimus vos latere Propter que omnes hujusmodi facinorum perpetratores eorumque auctores complices et fautores in majoris excommunicationis sententiam a sanctis patribus et institutis canonicis multipliciter promulgatam non est dubium damnabiliter incidisse Nos itaque attendentes tam statutis canonialibus quam civilibus convenire ut populus fidei Christiane ad oppressorum defensionem et inimicorum Dei et ecclesie impugnationem presertim pro defensione et salvatione patrie per exhortationes salubres efficaciter excitetur et modis ac viis licitis animetur pro defensione justa ecclesie et patrie atque regni ad celestia premia promerenda devotionem vestram in Domino duximus exhortandum quatenus fratribus vestri ordinis in nostra dioecesi existentibus doctoribus videlicet sacre pagine et ceteris qui ad predicandum populo fuerint deputati et specialiter Priori ejusdem ordinis domus vestre de Yarum cum omni celeritate qua poteritis injungatis quod tam in ecclesiis vestre religionis quam in aliis conventualibus et parochialibus ecclesiis ac ceteris locis insignibus convocata ad hoc populi multitudine contra dictos Scotos Dei et ecclesie inimicos sacrilegos ac ex premissis excommunicatione majore nodatos proponant publice et predicent verbum Dei ipsosque sic excommunicatos denuncient in vulgari ac populum cunctum fidelem nobis subditum in nostra dioecesi constitutum ad defensionem patrie et ecclesie curent salubribus exhortationibus animare et eisdem publice notificare quod nos omnibus nostris parochianis et aliis quorum dioecesani hanc nostram indulgentiam ratam habuerint de peccatis suis vere contritis penitentibus et confessis qui ad defensionem ut premittitur ecclesie patrie atque regni contra dictos Scotos manus apposuerint adjutrices xl dies de injuncta sibi penitentia misericorditer relaxamus Valete Data apud Cawod xix kalendas Februarii anno gratie MCCC quarto decimo et pontificatus nostri nono