Charter Document - 06480152
| Charter Number: | 06480152 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Order |
| Date: | 1314 |
| Date type: | Internal, Calendar, Episcopal |
| Resource Link(s): |
Borthwick Institute - Register 8 Part 2 (f36r) |
Charter:
Willelmus [] dilecto filio Officiali nostro Ebor salutem [] Ex quorundam relatione non sine grandi admiratione accepimus quod dominus Nicholaus de Menyl aliquos ecclesiarum rectores ac vicarios et alias personas ecclesiasticas vocari fecit ut compareant coram eo apud Esyngwald die Mercurii proximo post festum Sancti Nicholai cum equis et armis ad proficiscendum ad marciam Scotie et ad standum pro custodia ipsius ibidem licet nulla feoda seu terras omnino teneant quorum pretextu ad hujusmodi servitia sint astricti quodque idem dominus Nicholaus per se et suos complices seu ministros domos rectorum et vicariorum ac personarum ecclesiasticarum hujusmodi auctoritate quin potius temeritate propria ingredi non veretur personas ipsas ecclesiasticas procuratores et servientes ipsarum de domibus expellendo ac bona ecclesiastica ausu nefario occupando que si ita se habeant attemptata esse noscuntur in manifestum et enorme prejudicium ecclesiastice libertatis ac talia perpetrantes in majoris excommunicationis sententiam incidunt ipso facto Quocirca vobis injungimus et mandamus quatenus universis rectoribus vicariis et aliis personis ecclesiasticis de mora de Blakehouwe de Bulmer wapentach de Briddeford wapentach et de Rydale wapentach ac aliis de quibus videritis expedire inhibeatis auctoritate nostra in virtute obedientie et sub pena districtionis canonice quam si contra fecerint in eos non dissimulabimus exercere ne ad hujusmodi vocationem dicti domini Nicholai aut alterius persone laice cujuscunque absque nostra auctoritate et expressa licentia coram eis compareant quovis modo nec homines equos aut arma pro bellicis actibus inveniant seu ministrent in derogationem manifestam sui status et ecclesiastice libertatis Inhibentes insuper et facientes in dictis locis publice inhiberi ne dictus dominus Nicholaus seu quivis alius laicus personas ecclesiasticas predictas ad premissa vel eorum aliqua facienda compellat aut ex ea causa ipsis in personis vel rebus inferre presumat damnum molestiam vel gravamen sub pena excommunicationis majoris quam si qui contra fecerint se noverint incursuros Valete Data apud Cawod iiij idus Decembris pontificatus nostri anno nono