Charter Document - 06480147
| Charter Number: | 06480147 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Writ |
| Date: | 1314 |
| Date type: | Internal, A.D., Calendar, Episcopal |
| Resource Link(s): |
Borthwick Institute - Register 8 Part 2 (f102r) |
Charter:
Willelmus [] dilecto filio Officiali archidiaconi Ebor salutem gratiam et benedictionem Ad audientiam nostram nobili viro domino Johanne de Warenna comite Surr parochiano nostro nobis insinuante pervenit quod dum esset in minori etate et in custodia celebris memorie domini E quondam regis Anglie constitutus ad compulsionem quorundam nobilium et magnatum regni cum nobili muliere domina Johanna filia quondam comitis de Barro sibi in gradu consanguinitatis scilicet in tertio et in quarto ad matrimonium contrahendum a jure prohibito attinentem impedimenti hujus omnino inscius et ignarus matrimonium vi et metu [qui cadere poterant in constantem] de facto contraxit cum contractum quam cito potuit et audebat contradixit habensque postmodum de dicto impedimento notitiam ad suam conscientiam exonerandum propter evidens periculum animarum a nobis cum magna et frequenti instantia postulavit sibi in hac parte de competenti ac festino remedio provideri volentes igitur animarum eorundem saluti prospicere ut tenemur et ipsis juxta dicti negotii qualitatem exhibere in omnibus justitie complementum eo quod omnibus parochianis et subditis nostris sumus in exhibenda justitia debitores vobis mandamus firmiter injungentes quatenus citetis peremptorie dictam dominam Johannam in castris de Conyngesburgh et Sandale ubi domicilia habere dinoscitur si ibidem valeat personaliter inveniri alioquin ejus procuratorem si quem dimiserit et si nullum inibi dimiserit aliquo die Dominico vel sollemni dum missa cantatur in ecclesiis parochialibus dictarum villarum ac aliis locis insignibus et sollemnibus archidiaconatus predicti ubi videritis expedire publice proposito hujus citationis edicto denuntiationeque facta suis consanguineis notis et amicis ita quod non habeat verisimilem causam ignorandi quod compareat per se vel per procuratorem sufficienter instructum coram nobis vel nostris in hac parte commissariis in majori ecclesia nostra Ebor die Mercurii proximo post instans festum Sancti Michaelis dicto domino Comiti super premissis sibi canonice proponendis de justitia responsura factura et receptura ulterius secundum ipsius negotii qualitatem et naturam quod canonicis convenerit institutis denuntiantes publice quod sive venerit sive non in dicto negotio quantum de jure poterit procedetur Et qualiter mandatum nostrum fueritis executi nos vel commissarios nostros dictis die et loco distincte et aperte certificare curetis per vestras patentes literas harum seriem continentes Valete Data apud Cawod sexto idus Septembris anno gratie MCCCXIIIJ et pontificatus nostri nono