Charter Document - 06480142
| Charter Number: | 06480142 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Indulgence |
| Date: | 1314 |
| Date type: | Internal, A.D., Calendar, Episcopal |
| Resource Link(s): |
Borthwick Institute - Register 8 Part 2 (f267v) |
Charter:
Willelmus [] venerabili fratri nostro domino R[icardus] Dei gratia Dunolmensi episcopo salutem et fraternam in Domino caritatem In agendis omnibus prosperiorem evenire speramus effectum cum in ipsorum ingressu pariter et progressu ad Illum Qui omnium est dispositor atque rector fideles Christi spe firma suum dirigunt intuitum Ipsius presidium devotis precibus postulando Cum igitur serenissimus princeps dominus noster dominus Edwardus Dei gratia rex Anglie illustris cum suo exercitu ad partes Scotie jam dirigat gressus suos pro tranquillitate et securitate regni sui ad compescendum furiosum impetum Scottorum et ipsorum presumptuosam rabiem repellendum qui sue salutis immemores et clavium ecclesie contemptores contra fidelitatis juramentum ab eisdem prestitum non modicas partes Marchie dicti regni hostiliter sunt ingressi et nedum castra villas et fortalitia tam in terra Scotie quam in Marchia predictis verum etiam ecclesias et alia loca sacra non sine multorum innocentium tam clericorum quam laicorum interitu crudeliter invaserunt combusserunt et quod dolentes referimus penitus devastarunt bona etiam ecclesiastica damnabiliter rapiendo Dei timore postposito asportarunt dictasque partes Marchie gravibus et importabilibus tributis miserabiliter supponendo propter que eos in majoris excommunicationis sententiam incidisse ambiguum non existit Nos attendentes fructum uberem quem speramus ex devotis hujusmodi orationibus Divinam ad hec clementiam inclinantibus provenire et ob hoc in caritatis visceribus intimius affectantes nostrorumque subditorum animos ad devotionem hujusmodi quantum possumus excitare vobis injungimus et mandamus quatenus tam in ecclesia vestra cathedrali quam in ceteris ecclesiis collegiatis conventualibus et parochialibus vestre civitatis et dioeceseos exemptis et non exemptis faciatis in singulis missis de cetero celebrandis pro salubri statu et prospero dicti domini nostri regis ipsiusque exercitus et sibi adherentium mentionem fieri specialem ita quod orationes illas que pro pace dici consueverunt presbyteri in suis missis cum devotione debita dicere non omittant ut Deus et Dominus noster rerum omnium Dispositor providus pro Sua pietate gressus suos et actus dirigat et disponat ipsumque regem cum toto suo exercitu ab adversis protegat et defendat necnon pacis optate tranquillitatem et sibi de inimicis suis triumphum concedat ad ipsius honorem regni salvationem et totius utilitatem ecclesie Anglicane Et nos de Ipsius Omnipotentis Dei misericordia gloriose Virginis Marie matris Sue beatorum Apostolorum Petri et Pauli necnon sanctissimi Confessoris Willelmi Omniumque Sanctorum meritis et precibus confidentes omnibus parochianis nostris et aliis quorum dioecesani hanc nostram indulgentiam ratam habuerint et acceptam de peccatis suis vere contritis penitentibus et confessis qui pro eisdem domino nostro rege suoque exercitu devote oraverint ut est dictum quadraginta dies de injuncta sibi penitentia Deo propitio misericorditer relaxamus Data apud Cawode quarto kalendas Junii anno gratie MCCC quarto decimo et pontificatus nostri nono