Charter Document - 06480141
| Charter Number: | 06480141 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Request |
| Date: | 1314 |
| Date type: | Internal, A.D., Calendar |
| Resource Link(s): |
|
Charter:
Excellentissimo principi et domino suo domino E[dwardus] Dei gratia regi Anglie illustri suus capellanus humilis et devotus Johannes miseratione Ejusdem Karliolensis episcopus salutem in Eo cui servire perenniter est regnare Variis negotiis et arduis statum nostrum et ecclesiam nostram Karliolensem ac Marchiam adjacentem tangentibus multipliciter prepediti et eo amplius quo rabies inimicorum nostrorum Scotie crudelissima in nostris partibus indies invalescit quominus hac instanti die Dominica in quindena Pasche in parliamento vestro apud Westmonasterium valeamus personaliter interesse vestram regalem celsitudinem humiliter duximus exorandum quatenus absentiam nostram hac vice dignemini habere excusatam et ut voluntati vestre potius pareamus dilectos nobis in Christo dominum W de Ayreminne rectorem ecclesie de Levington et dominum Hugonem de Burg rectorem ecclesie de Burg sub Mora nostre dioecesos procuratores nostros ad comparendum pro nobis et nostro nomine in dicto parliamento ordinamus facimus et constituimus per presentes Dantes eisdem plenam et liberam potestatem ac speciale mandatum ad tractandum faciendum et consentiendum omnibus et singulis que tunc de communi consilio super negotiis statum regni tangentibus in prefato parliamento favente Domino contigerit ordinari ratum et gratum habituri quicquid idem procuratores nostro nomine faciendum duxerint in premissis In cujus rei testimonium [] Data Karlioli ij nonas Aprilis anno Domini MCCC quarto decimo