Charter Document - 06480137
| Charter Number: | 06480137 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Order |
| Date: | 1313 |
| Date type: | Internal, A.D., Calendar, Episcopal |
| Resource Link(s): |
Borthwick Institute - Register 8 Part 2 (f32r) |
Charter:
Willelmus permissione Divina Ebor archiepiscopus Anglie primas dilectis filiis dominis Willelmo de Houkes et Rogero de Clotherum militibus ac Johanni de Donecastre justitiariis domini nostri regis ad liberationem gaole Ebor ut dicitur assignatis salutem gratiam et benedictionem Cum sanctorum patrum decretis synodalibus ad Divini cultus augmentationem ac salutem populi Christiani provide sit statutum ut certis anni temporibus et precipue infra Passionem Domini Salvatoris nullus super sacra Evangelia jurare nisi ubi de concordia et pacis reformatione agitur per laicalem potentiam compellatur vobis omnibus et singulis sub pena districtionis canonice inhibemus ne super liberatione incarceratorum vel aliis assistis capiendis hoc sacro tempore infra Passionem Domini absque nostra presertim licentia speciali contra statuta canonica quemquam Christianum jurare compellere presumatis Valete Data apud Burton juxta Beverlacum vj idus Aprilis anno gratie MCCC tertio decimo et pontificatus nostri octavo