Charter Document - 06480131

Robertus de Pykering canonicus Eboracensis venerabilis patris domini Willelmi Dei gratia Eboracensis archiepiscopi Anglie primatis in remotis agentis vicarius generalis et ejusdem patris in celebratione Concilii Provincialis Eboracensis et omnibus dictum Concilium contingentibus commissarius specialis religiosis viris Abbati et Conventui de Ryevalle salutem in amplexibus Salvatoris Cum nuper in Concilio Provinciali Eboracensi vocatis ad id tam exemptis quam non exemptis juxta sedis mandatum Apostolice tam super statu Templariorum quam super aliis articulis transmittendis ad Generale Concilium celebrato de unanimi consensu predicti Concilii extitit ordinatum ut singule Templariorum persone ad diversa religiosorum loca tam exemptorum quam non exemptorum juxta discretionem nostram mitterentur sub fida custodia inibi morature prout in literis tam vobis quam aliis religiosis personis directis plenius continetur Et quia ut intelleximus fratrem Henricum de Kereby Templarium auctoritate dicti Concilii ad vos missum quem licet de jure tenebamini ad mandatum hujusmodi reverenter et obediente prout per vestrum certificatorium recepimus admisistis ipsum tamen de novo ut recepimus debite tractare et alimenta ministrare necessaria eidem in enervationem ordinationis dicti Concilii et contemptum manifestum sedis Apostolice non curatis Nos attendentes quam periculosum vobis fuerit in his que fidei negotium contingunt resistere seu humiliter non parere quodque quantumcunque exempti fueritis et soli sub jacueritis sedis Apostolice potestati nihilominus in his que sunt contra hereticos instituta ordinariorum tenemini subire judicium et eis et in hac parte obsequi tanquam a sedis Apostolice delegatis privilegiis vestre non obstantibus libertatis et quia nolumus vestram quoad predictum fratrem Henricum Templarium et ejus exhibitionem negligentiam proterviam vel rebellionem sicut nec poterimus in periculum Christiane fidei dissimulare aut oculis conniventibus preterire vobis in virtute obediente qua memorate sedi Apostolice tenemini et auctoritate dicti Concilii et sub periculo status vestri ac sub pena canonica districtionis quam si monitis nostris non paruerit is poteritis non immerito formidare injungimus firmiter et mandamus quatenus dictum Henricum juxta vim formam et effectum mandati vobis alias directi non obstante cujuslibet emptionis vestre privilegio sive titulo sibi in hoc canonice locum minime vindicante in alimentis necessariis et aliis in priori mandato contentis juxta statum persone sue de cetero sicut convenit pertractetis et eidem etiam ministretis In premissis taliter vos habentes ne querela super his ad nos perveniat iterata alioquin contra vos cum rigore juris in quantum de jure poterimus procedemus Certificantes nos super presentis executione mandati infra octo dies a tempore receptionis ejusdem et quicquid faciendum duxeritis in premissis distincte et aperte per vestras patentes literas harum seriem continentes Datum apud Eboracum kal Martii anno gratie millesimo CCC undecimo