Charter Document - 06480123
| Charter Number: | 06480123 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Request |
| Date: | 1310 |
| Date type: | Internal, Calendar, Episcopal |
| Resource Link(s): |
Borthwick Institute - Register 7 (f334v) |
Charter:
Venerabili in Christo patri domino W[illelmus] Dei gratia episcopo Sancti Andree in Scotia Willelmus permissione Divina Eboracensis archiepiscopus Anglie primas salutem et sinceram in Domino caritatem Ex quorundam fide digna relatione accepimus quod Beatrix de Hodesak olim in monasterio Sanctimonialium de Caldestrem vestre dioeceseos regulariter professa et in conventu ibidem per annos plurimos demorata dudum imminente guerra in partibus Scotie a dicto monasterio recessit animum revertendi non habens a prelato suo vel presidente sui ordinis licentia non obtenta jamque in quodam loco anachoritarum juxta Doncastre in nostra dioecesi moram trahit Cum itaque boni pastoris sit errantem ovem que a grege suo recedendo perierat pie compassionis studio requirere et ad ovile suum a quo propria temeritate recesserat in caritatis visceribus revocare reverendam paternitatem vestram in Domino requirimus et rogamus quatenus in dicto monasterio super premissis prout vestre prudentie videbitur facientes inquiri nos super his que inveneritis velitis si placet vestris literis efficere certiores Nosque ad requisitionem vestram contra monialem predictam propter anime sue salutem prout nobis scripseritis in juris subsidium executionem debitam faciemus Conservet vos Dominus in prosperis ad ecclesie Sue regimen per tempora feliciter successiva Data apud Cawod ix die Junii pontificatus nostri anno quinto