Charter Document - 06480122
| Charter Number: | 06480122 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1309 |
| Date type: | Assigned |
| Resource Link(s): |
Borthwick Institute - Register 7 (f311v) |
Charter:
Philippus Dei gratia Francie rex venerabili patri dilecto nobis in Christo Ejusdem gratia [] Eboracensi archiepiscopo salutem et unice dilectionis affectum Noverit vestra sinceritas qualiter his diebus Magister totius ordinis Templi et Francie terre ultramarine Normannie Aquitanie et Pictavie Preceptores majores necnon maxima multitudo fratrum dicti Ordinis Si debeat Ordo dici alii in sanctissimi patris summi pontificis et cardinalium omnium presentia alii coram quibusdam cardinalium ad eosdem per sedem Apostolicam destinatis et alii coram archiepiscopis episcopis et inquisitoribus heretice pravitatis pene in omnibus partibus regni nostri singulariter et sponte et absque terrore cujusque et coactione qualibet sunt confessi quod est consuetudo dicti Ordinis immo juris corruptela quod in receptione cujuslibet qui recipitur Christum abnegat supra crucem que eidem ostenditur spuit in vituperium crucifixi ad multa scelera et crimina detestabilia inimica fidei Christiane et humane disconvenientia rationi se obligant et ea permittunt complere propter que idem summus pontifex jubente ad hoc eundem officii debito pastoralis mandavit ipsos ab omnibus Christi fidelibus tanquam hereticos et de heresi vehementer suspectos ubique terrarum arctius evitari mandans nihilominus eos capi ac per vos et alios locorum ordinarios contra ipsos qui alia premissa non fuerint confessi de premissis inquiri Nos quam desiderabiliter affectantes tam horrendorum criminum et nefandorum heresium virus ad laudem Christiani nominis et honorem sancte catholice fidei confutari et exterminari omnino honoratis viris et discretis [] abbati monasterii Lacigniacensis et magistro Sycardo de Vauro predicti summi pontificis capellanis ad inquirendum contra singulares personas dicti Ordinis in regno Anglie et totum Ordinem ad regnum predictum per sedem Apostolicam specialiter destinatis copias processuum et confessionum in summi pontificis predicti et cardinalium ipsorum et quorundam prelatorum regni nostri et Universitatis studii Parisius [presentia] factorum duximus transmittendum ut per processus eosdem super predicto negotio vos et ipsi possitis plenius informari et ali qualem forsitan si necesse fuerit instructionem habere sinceritatem vestram affectuose rogantes et in Domino Jhesu Christo hortantes ut vos qui estis in partem sollicitudinis electus tanquam honorabile et fulgidum membrum ecclesie sancte Dei in prosecutione dicti negotii pro stabilitate fidei Christiane ita potenter et hilariter vestre prudentie et sollicitudinis studium exponatis et efficaciter laboretis quod ad Omnipotentis Dei Cujus negotium geritur cedat gloriam et honorem predictaque secta pestifera immo juris insania per vestram et aliorum zelatorem nominis Christiani diligentem industriam extinguatur Datum in abbatia Longipontis Suessionensis dioeceseos in festo Omnium Sanctorum