Charter Document - 06480120
| Charter Number: | 06480120 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Request |
| Date: | 1309 |
| Date type: | Assigned |
| Resource Link(s): |
Borthwick Institute - Register 7 (f298v) |
Charter:
Reverendo in Christo patri et domino domino Willelmo Dei gratia Eboracensi archiepiscopo Universitas Magistrorum et Scolarium Parisius studentium devotam juxta posse promptitudinem complacendi Dum virorum probitates diligenter exquirimus dum vite puritatem in eis diligentius intuemur dum peritie decus constanter in eisdem ut noscimus suas preces libenter audimus et auditas festinamus libentius fructuosis effectibus mancipare aut quomodo saluber ille monitus divi Pauli placidum Divinis arbitriis et in nobis complementum pater alme reciperet quo monemur alterna gravamina fraternis affectibus supportare et quum eosdem pro libito nos ipsi juvare conferendo non possumus divites sublimes ac potentes precamur pro eisdem personis prebentes saltem consonum et dignum testimonium veritati nam peccat et qui promit mendacium et qui suffocat veritatem Ea propter pro magistro Alano de Penrhet Anglico diu retroacto tempore regente Parisius in artium facultate devoto nostro clerico et quasi de vestra dioecesi oriundo viro probo viro moribus exornato viro condito jurisperitis Universitatis nostre membro necnon inter nos quamplurimum dilecto tam propter honestam conversationem quam propter ejus regulatam prudentiam in tantum quod suis exigentibus meritis Universitatis nostre bis extitit rector presentes nostras preces ad benignos auditus paternitatis vestre affectuosis esse duximus necnon devotis animis dirigendas quas quamvis rationibus multis eidem magistro futuras fructosas putemus quod tam nobilis vestra conditio quam dignitas sacrati presulatus corroborat ex hoc tamen non minus nostras preces utiles ei fore concipimus quod cum Parisiensis Universitas vos dudum scolasticum nobile sui membrum conspexerit sicut in membris corporis nostri principalia debilibus suffragantur sic excellens vestra provisio aliqua membra studii nostri fovebit gratiosis affectibus ac levabit Quocirca paternitatis vestre decus quam devotius possumus exoramus quatenus et Ejus intuitu Qui vos auxit et augeat ut optatis de competenti beneficio eidem magistro benigne dignemini providere propter Deum Conservet Altissimus presidentiam vestram ecclesie Sue sancte per tempora longiora In cujus rei testimonium sigillum nostrum presentibus literis duximus apponendum