Charter Document - 06480119
| Charter Number: | 06480119 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1309 |
| Date type: | Internal, Calendar, Papal |
| Resource Link(s): |
Borthwick Institute - Register 7 (f300r) |
Charter:
Clemens episcopus servus servorum Dei venerabilibus fratribus [] archiepiscopo Eboracensi et Londinensi ac Carliolensi episcopis salutem et Apostolicam benedictionem Significavit nobis carissimus in Christo filius noster Edwardus rex Anglie illustris quod licet Robertus comes Carrik clare memorie Edwardo regi Anglie genitori suo dum adhuc viveret homagium et fidelitatem debitam pluries prestitisset promittens prestito juramento ipsum et successores ejus reges Anglie qui essent pro tempore occasione regni Scotie nullo unquam tempore molestare demum tamen idem Comes contra fidelitatem homagium et juramentum hujusmodi tanquam sue salutis immemor temere veniens diversos guerrarum impetus contra genitorem eundem injuriose movere et continuare diutius damnabili temeritate presumpsit homicidia innumera incendia sacrilegia depredationes et violentias alias in prosecutione guerrarum hujusmodi nequiter committendo et quod est horribilius detestandum quendam Johannem et quendam Robertum de Comyn de terra Scotie milites Glasguensis dioeceseos predicti genitoris fideles acquiescere contra predictum regem suis perversis actibus recusantes alterum eorum videlicet in claustro alterum vero in ecclesia Fratrum Ordinis Minorum de Dunfres Glasguensis dioeceseos juxta majus altare ipsius ecclesie exuta prorsus humanitatis mansuetudine miserabiliter gladio interfecit in ejus refrigerare sanguinem calentem gladium non contentus nisi sanguinem ipsum ejusque cerebrum evulsum de capite supra dictum altare feritate diffunderet bestiali propter quod idem Comes excommunicationis sententiam auctoritate privilegiorum sedis Apostolice eisdem Fratribus et Ordini concessorum [per que indultum eis fore dinoscitur quod omnes ecclesias aut loca infringentes ipsorum vel in eis violentiam damnabilem inferentes incurrunt excommunicationis sententiam ipso facto] dinoscitur incurrisse Et demum tu frater Londinensis episcope conservator privilegiorum ipsorum eisdem Fratribus et Ordini per dicte sedis literas in illis partibus deputatus Comitem supradictum prout ex virtute poteras literarum ipsarum fecisti excommunicatum publice nuntiari verum adhuc ipse Comes tam enormibus et horrendis sceleribus non contentus sed potius in sua nequitia damnabiliter perseverans pejora prioribus assidue claves ecclesie contemnendo committere non formidat in Anglie et predicti Scotie regnorum grande dispendium et promotionis negotii Terre Sancte quod specialiter insidet cordi nostro in eisdem regnis prejudicium manifestum que omnia adeo publica et manifesta et notoria fore noscuntur quod nulla possunt tergiversatione celari et ne in posterum ex premissis deteriora contingant verisimiliter formidatur Quare prefatus rex nobis humiliter supplicavit ut cum idem Comes incorrigibilis sit effectus dictamque sententiam damnabiliter vilipendens eam sustinuerit per tres annos et amplius et adhuc sustineat in contemptum clavium animo indurato nec ad ecclesie unitatem redire procuret in anime sue periculum plurimorum scandalum et ipsius regis prejudicium manifestum ejus obviantes in hac parte nequitie dictam sententiam faceremus firmitatis robur debitum obtinere quocirca fraternitati vestre per Apostolica scripta mandamus quatenus vos vel duo aut unus vestrum per vos vel per alium seu alios eandem sententiam observari inviolabiliter facientes predictum Comitem sive de mandato nostro sive privilegiorum predictorum vigore cum excommunicatum fore pro predictis excessibus vobis legitime constiterit excommunicatum sollemniter et publice in locis de quibus expedire videritis singulis diebus Dominicis et festivis pulsatis campanis et candelis accensis donec super premissis congrue satisfecerit nuntietis et faciatis ab omnibus arctius evitari civitates quoque terras castra et loca qualibet de predicto regno Scotie que ipsum sic ligatum receptare vel eidem obedire presumpserint supponatis ecclesiastico interdicto Data Avinione xij kalendas Junii pontificatus nostri anno quarto