Charter Document - 06480117

Clemens episcopus servus servorum Dei venerabili fratri [] archiepiscopo Eboracensi salutem et Apostolicam benedictionem In medio pectoris Apostolici venerabilis Burdegalensis ecclesia sicut filia predilecta recumbens in caritatis visceribus illam prenimia dilectione portamus et paterne pietatis brachiis amplexantes ipsam libenter specialium donorum decoramus ornatibus et gratiarum dotibus insignimus et eo desiderantius appetimus ut fidelium populi in splendore ambulent vultus ejus quo illam devotionis igne succensi frequentius visitantes deliciarum celestium se affluentius refici perspexerint ubertate Hec est enim ecclesia que a juventutis nostre primordiis suis deliciis nos educavit ut filium more matris hujus quidem dulcedinis ubera suximus ipsa nos fovit in virum et tandem nos in suum pastorem assumens gradum se nostris subjecit ascensibus per quem ascendimus solium Apostolice dignitatis Propterea ipsam post Romanam ecclesiam dilectissimam sponsam Christi quam nobis licet immeritis dignanter custodiendam commisit inter universas orbis ecclesias oculi nostri votive respiciunt et digne ad sui honoris et status augmentum studia nostra convertimus digne ad decorem ejus opportunas sollicitudines adhibemus et digne ad devotionem illius renatos fonte baptismatis spiritualitatis muneribus invitamus Considerantes igitur quod eadem Burdegalensis ecclesia in honore beati Andree Apostoli gloriosi constructa metropolitana insignis existit et alias multe coruscat privilegio dignitatis quodque in ea de ipsius Apostoli sacratissimo corpore et aliorum plurimorum Martyrum Confessorum et Virginum venerabiles reliquie que multa sunt veneratione colende a cunctis fidelibus requiescunt et preterea decens et congruum reputantes ut fideles populi quos sicut nobis ex debito pastoralis incumbit officii acceptabiles reddere desideramus Altissimo ad implorandum ibidem Divinam misericordiam pro peccatis et spiritualium oblectationum recreationem ac dulcedinem refectionis eterne sumendam ad ecclesiam ipsam velut ad portum confluant salutarem omnibus vere penitentibus et confessis qui ad dictam ecclesiam in festo Translationis ejusdem Apostoli quod die nona introitus mensis Maii in eadem ecclesia celebratur causa devotionis annis singulis accesserint reverenter quatuordecim annos et totidem Quadragenas Illis vero qui per viginti dies festum Translationis ipsius proxime precedentes et totidem hujus Translationis diem immediate sequentes eandem ecclesiam devotis animis visitaverint annuatim de Omnipotentis Dei misericordia et beatorum Petri et Pauli Apostolorum Ejus auctoritate confisi septem annos et septem Quadragenas pro die quolibet ipsorum quadraginta dierum de injunctis eis penitentiis misericorditer in Domino duximus relaxandum Ut autem Christi fideles civitatis et dioeceseos Eboracenses eo libentius ad prefatam ecclesiam pro eadem indulgentia habenda concurrant quo expressius de illa certitudinem habuerint pleniorem fraternitatem tuam monemus et hortamur attentius tibi in virtute obediente districte precipiendo mandantes quatenus memoratam indulgentiam per prelatos et rectores ecclesiarum et locorum dictarum civitatis et dioeceseos et alios de quibus expedire videris frequentius diebus Dominicis et festivis in ecclesiis et locis eorum et alibi in congregationibus fidelium ubi tibi videbitur opportunum ipsiusque seriem et tenorem in lingua vulgari juxta modum loquendi ipsius patrie distincte et aperte per singula fidelibus populis facias quam citius fieri poterit diligenter exponi Et nihilominus suffraganeis tuis quod eandem indulgentiam per prelatos et rectores ecclesiarum et locorum civitatum et dioeceseos et alios de quibus eis videbitur in eisdem ecclesiis et locis per eosdem prelatos rectores et alios modo quo supra publicari faciant et exponi auctoritate nostra sub virtute obediente mandare procures illam in premissis in honorem ejusdem Apostoli devotionis efficaciam et reverentie studium impensurus quod ejusdem Apostoli intercedentibus meritis tibi ad hereditatis Dominice gloriam aditus facilius preparetur nosque diligentiam quam in hac parte duxeris adhibendam in Domino valeamus merito commendare Volumus insuper et mandamus quod te in remotis agente dilecti filii Vicarius in Spiritualibus vel Officialis tui predicta omnia et singula cum diligentia exequantur Data Pictavis xij kalendas Februarii pontificatus nostri anno tertio