Charter Document - 06480116
| Charter Number: | 06480116 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Mandate |
| Date: | 1307 |
| Date type: | Internal, A.D., Calendar, Episcopal |
| Resource Link(s): |
Borthwick Institute - Register 7 (f51r) |
Charter:
Willelmus permissione Divina [] dilecto filio Officiali nostro Eboracensi salutem gratiam et benedictionem Mors absque differentia omni postposita reverentia in omnes homines seviens dominum nostrum carissimum dominum Edwardum illustrem regem Anglie ab hac luce subtraxit Quem etsi credamus supernis civibus aggregatum eaque consideratione habita ei omni luctu deposito congratulari merito debeamus quippe cum ab hoc regno transitorio pro cujus regimine juges ab adolescentia labores sustinuit et erumnas pro cujusque defensione in hac vita positus sese mille mortibus exposuit ad celeste solum migravit feliciter et perenniter regnaturus Quia tamen amodo in hac vita sumus ejus corporali presentia et protectione tutissima carituri non poterimus non dolere quinimmo interiora nostra doloris gladius pertransivit nimirum non solum damnum Anglie verum totius orbis plangimus importabile detrimentum ut brevi stilo amplissimam profundi luctus materiam perstringamus Edwardo moriente marcuit et aruit flos militie singularis quinimmo pro dolor occubuit gloria terrestrium principatuum et regnorum in eo namque florebat ac etiam eminebat quicquid honestatis bonitatis et probitatis posset in principe seculari specialiter designari Non miretur itaque aliquis quod propter jacturam tantam totius mundi voces lugubres depromamus Cum igitur sancta sit et salubris cogitatio pro defunctis orare merito debemus tantum principem orationum et aliorum beneficiorum suffragiis prosequi ut ei mortuo videamur aliquam saltem vicem gratitudinis impendisse Volumus itaque et mandamus quatenus in singulis nostre provincie ecclesiis cathedralibus collegiatis parochialibus et aliis piis locis in quibus Divina officia celebrantur aliquibus ad hoc aptis diebus citra festum Beati Michaelis proximo futurum exequie dicti regis cum missa et alio officio consueto sollemniter celebrentur quodque deinceps in orationibus et aliis bonis operibus singuli clerici et laici eum habeant specialiter commendatum Nos vero de Dei Omnipotentis misericordia et gloriose Virginis matris sue beatorum Apostolorum Petri et Pauli necnon sanctissimi Confessoris Willelmi Omniumque Sanctorum meritis confidentes omnibus parochianis nostris et aliis quorum dioecesani hanc nostram indulgentiam ratam habuerint de peccatis suis vere contritis penitentibus et confessis qui pro anima dicti domini regis devote oraverint saltem Orationem Dominicam cum Salutatione Beate Virginis pia mente dicentes quadraginta dies de injuncta sibi penitentia Deo propitio misericorditer relaxamus Quocirca vobis committimus et mandamus quatenus premissa sine more dispendio faciatis per totam nostram provinciam publicari ac executioni debite demandari Valete Data apud Lenton vij die Augusti anno gratie millesimo tres centesimo septimo et pontificatus nostri secundo