Charter Document - 06480110

Universis sancte matris ecclesie filiis ad quos presentes litere pervenerint Willelmus permissione Divina [] salutem in amplexibus Redemptoris Quamquam ex pastorali officio ac viscerosa compassione teneamur depressionibus occurrere subditorum fratrum tamen nostrorum coepiscoporum incommodis eo favorabilior ac proniori affectu mos convenit cum opus fuerit subvenire quo nobiscum in vinea Dei ad lucri factionem animarum ipsos in partem sollicitudinis nostre vocatos novimus vigilantius laborare Quapropter nos ad Statum cathedralis ecclesie Candide Case suffraganee nostre necnon venerabilis fratris nostri domini Thome Dei gratia ejusdem loci episcopi [cujus possessiones maneria et nonnulla loca alia ad episcopatum Candide Case spectantia per guerram Scotie vicibus diversis obortam quasi ad nihilum sunt redacta animalibus et bonis inventis abductis penitus et consumptis adeo quod bona et facultates episcopatus predicti ad quotidiana eidem episcopo incumbentia onera sufficere non poterunt ut deceret nisi Summus Largitor bonorum manum apposuerit adjutricem] pietatis intuitum ac compassionis oculos dirigentes pensantesque quod ob guerram predictam dictus frater noster facultatibus et bonis suis consumptis hospitalitatem tenere non potest quinimmo necesse urgente jam diu in partibus Anglie conversatus in sua dioecesi locum non habet in quo juxta status sui decentiam se valeat receptare Attendentes etiam quod redditus et proventus dicti episcopatus adeo sunt tenues et exiles quod dicto fratri vix sufficerent etiamsi pax esset que omnia preter causas alias legitimas nobis expositas nos inducunt et animum nostrum inclinant ut eidem fratri nostro et sue ecclesie in tanta necessitate prout est nobis possibile succurramus Nos devotionem venerabilis fratris nostri predicti ac status sui condecentiam suorumque predecessorum merita qui se predecessoribus nostris et nostre Eboracensis ecclesie semper exhibuerunt devotos intime ponderantes cupientes etiam exilitatis proventuum episcopatus predicti prospicere in quantum sufficimus ut debemus ecclesiam de Carnemole Candide Case dioeceseos de patronatu ipsius episcopi pertinentem ad eandem que per unum rectorem consuevit hactenus gubernari prefato fratri nostro ejusque successoribus qui pro tempore fuerint et ecclesie Candide Case predicte de assensu dilectorum filiorum capituli nostri Eboracensis auctoritate metropolitica in Dei nomine conferimus appropriamus et in perpetuum assignamus jure ac dignitate nostre Eboracensis ecclesie nostris etiam et successorum nostrorum in omnibus semper salvis Ordinantes quod in dicta ecclesia de Carnemole perpetuus ex collatione dicti fratris nostri et successorum suorum instituatur vicarius cujus vicariam ad estimationem decem librarum sterlingorum taxamus que in certis decimis obventionibus seu proventibus dicte ecclesie prefate vicarie perpetuo assignandis consistat Qui quidem vicarius habeat mansum quod rector prefate ecclesie inhabitare solebat aut aliud competens et sufficiens pro eodem Onera vero predicte ecclesie incumbentia idem subeat vicarius extraordinaria quidem ad prefatos episcopum et vicarium et successores eorum pro rata suarum pertineant portionum In cujus rei testimonium sigillum nostrum presentibus est appensum Data apud Eboracum xij kalendas Octobris anno gratie millesimo CCC sexto et pontificatus nostri primo