Charter Document - 06480098
| Charter Number: | 06480098 |
|---|---|
| Cartulary Title: | Historical papers and letters from the Northern Registers [York] |
| Charter Language: | Latin |
| Charter Origin: | Religious |
| Charter Type(s): | Request |
| Date: | 1301 |
| Date type: | Internal, A.D., Calendar |
| Resource Link(s): |
|
Charter:
Venerande religionis viro domino [] abbati de Waltham collectori sive executori decime omnium ecclesiasticorum beneficiorum et redituum in toto regno Anglie domino Edwardo Dei gratia regi Anglie illustri per sedem Apostolicam concesse in subsidium Terre Sancte una cum venerabili viro domino [] decano Sancti Pauli Londonensis per eandem sedem specialiter deputato Johannes miseratione Divina Karliolensis episcopus salutem et paratam ad beneplacita voluntatem Sancta Romana ecclesia universarum ecclesiarum pia domina et magistra in imponendo omnibus suis subditis deliberatione provida sic disponit ut pensatis quotidianis et necessariis expensis incumbentibus ipsius subditi onera imposita absque gravi possint incommodo tolerare per quod filialis obedientia fit devotior ad obsecrandum promptior et ad subveniendum pronior gratis affectibus et votivis Sane vestram discretionem providam credimus non latere qualiter subdola gens Scotorum nostram dioecesin quadriennio jam elapso manu hostili invadens ipsam cum suis incolis pro magna parte destruxit pariter et combussit adeo quod quidam religiosi destructis monasteriis pro dolor sint dispersi nonnullis ecclesiis cum parochiis in cinerem et favillam redactis curati non valentes ex earum proventibus sustentari aliorum stipendiarii sic effecti mendicare aliena suffragia sunt compulsi Cum igitur religiosi viri prior et conventus ecclesie Beate Marie Karlioli sub collectores vestri dicte decime in civitate et dioecesi nostra Karliolensi a nobis et clero nostro decimam bonorum ecclesiasticorum et redituum nostrorum secundum taxationem per dominos Wyntonensis et Lincolnensis ante hujusmodi destructionem et combustionem factam pro quarto et quinto anno non per vos ut creditur sed motu proprio exigere nunc conantur nosque sic ad impossibile coarctare vestram circumspectam benevolentiam iteratis precibus humiliter imploramus quatenus statu lamentabili nostre dioeceseos que adhuc continuis oppressionibus per regales exercitus diversarum nationum quasi irrecuperabiliter deprimitur humano compatientes affectu prefatis sub collectoribus vestris velitis dare per vestras literas in mandatis ut secundum valorem beneficiorum nostrorum reddendum his diebus decimam exigant nunc petitam cum felicis recordationis Nicholaus papa Quartus hujus decime impositori seu concessor beneficia statuit sic taxari de taxatis decimam sic persolvi ut ecclesie ipsarumque rectores precisa materia scandali possent ipsam taxationem sine gravi incommodo tolerare ac decime solutio integralis secundum taxationem impossibilis sit omnino Premissa siquidem sine culpa nostra post predictam taxationem emersa infra cordis vestri intima in visceribus caritatis et compunctionis humane compassionaliter si libeat revolventes sic oppressis debitum remedium et equitati consonum per viam nove taxationis seu respectus ad presens dignemini impertiri ut cumulus vestri meriti et honoris accrescat et afflicti se sentiant ali qualiter relevatos Statum vestrum prosperum cum incremento felici conservet Altissimus et semper dirigat in honore Data Karlioli xvij kalendas Decembris anno Domini MCCC primo